चिलीले आफ्नी पूर्व राष्ट्रपति मिशेल बासेलेलाई संयुक्त राष्ट्रसङ्घको आगामी महासचिव बनाउन आधिकारिक रूपमा समर्थन गरेको छ। चिलीका राष्ट्रपति ग्याब्रियल बोरिकले सोमबार बासेलेको उम्मेदवारी घोषणा गर्दै उनलाई ब्राजिल र मेक्सिकोको पनि साथ रहने जानकारी दिए।

७४ वर्षीया बासेलेले सन् २००६ देखि २०१० र सन् २०१४ देखि २०१८ सम्म दुई कार्यकाल चिलीको राष्ट्रपतिको रूपमा नेतृत्व गरेकी थिइन्। उनी ल्याटिन अमेरिकाकै पहिलो महिला रक्षामन्त्री र चिलीको इतिहासमा राष्ट्रपति निर्वाचित हुने पहिलो महिला पनि हुन्।

बासेलेसँग संयुक्त राष्ट्रसङ्घमा काम गरेको लामो र प्रतिष्ठित अनुभव छ। उनले संयुक्त राष्ट्रसङ्घीय मानवअधिकार उच्चायुक्त र संयुक्त राष्ट्रसङ्घीय महिला निकायको पहिलो प्रमुखको रूपमा समेत सेवा गरिसकेकी छन्।

गत वर्ष नै बोरिकले उनको मनोनयन दर्ता गरेका थिए भने पछि उनले समर्थन जुटाउन विपक्षी नेता जोसे एन्टोनियो कास्टसँग पनि भेट गरेकी थिइन्। बासेलेले हालै एक अन्तर्वार्तामा विश्व अब महिला नेतृत्व स्वीकार गर्न र फरक प्रकारको योगदान लिन तयार रहेको बताएकी थिइन्।

संयुक्त राष्ट्रसङ्घको नेतृत्व चयनमा परम्परागत रूपमा क्षेत्रीय आलोपालो प्रणाली अपनाइन्छ। वर्तमान महासचिव एन्टोनियो गुटेर्रेसको कार्यकाल समाप्त भएपछि अबको पालो ल्याटिन अमेरिकाको रहेको छ।

राष्ट्रपति बोरिकले बासेलेको उम्मेदवारीलाई आफ्ना छिमेकी देशहरू ब्राजिल र मेक्सिकोसँग मिलेर संयुक्त रूपमा प्रस्तुत गरिने बताएका छन्। यसले उनको दाबेदारीलाई अझ बलियो बनाएको छ।

यो दौडमा बासेले एक्ली भने छैनन्, ल्याटिन अमेरिका र क्यारेबियन क्षेत्रका अन्य प्रभावशाली महिलाहरू पनि प्रतिस्पर्धामा छन्। कोस्टारिकाकी रिबेका ग्रिस्पान, मेक्सिकोकी एलिसिया बार्सिलोना र बार्बाडोसकी प्रधानमन्त्री मिया मोटली पनि नेतृत्वको लाइनमा रहेका छन्।

यसका साथै अर्जेन्टिनाका राफेल ग्रोसीले पनि महासचिवका लागि उम्मेदवारी दिएका छन्। ८१ वर्ष पुगेको संयुक्त राष्ट्रसङ्घको इतिहासमा अहिलेसम्म कुनै पनि महिलाले महासचिवको पद सम्हाल्न पाएका छैनन्, त्यसैले यसपटक बासेलेको उम्मेदवारीलाई निकै महत्वका साथ हेरिएको छ।