ताइवानको पहिलो घरेलु पनडुब्बी बनाएको विषयलाई चीनले प्रतिक्रिया दिएको छ । चीनको रक्षा मन्त्रालयले आफ्नो कट्टर प्रतिद्वन्द्वी ताइवानको उपलब्धिको मजाक उडाएको अन्तर्राष्ट्रिय सञ्चारमाध्यमले जनाएका छन् ।

चीनले ताइवानको पहिलो घरेलु पनडुब्बी प्रक्षेपण गर्ने वार्तालाई अस्वीकार गरेको छ। “यो राष्ट्रिय एकतालाई रोक्ने प्रयासबाहेक केही होइन,” चीनको रक्षा मन्त्रालयका प्रवक्ता वरिष्ठ कर्नेल वु छियानले भनेका छन् ।

चीनले ताइवानलाई एक विद्रोही प्रान्त मानेकाले यसलाई मुख्य भूमिसँग पुनर्मिलन गर्नुपर्ने उनले बताएका छन् । बेइजिङले ताइवानलाई औपचारिक रूपमा स्वतन्त्रता र कुनै पनि विदेशी समर्थनको घोषणा नगर्न चेतावनी दिएको छ।

चीनले ताइवान वरपर आफ्नो उत्तेजक सैन्य अभ्यास गरेर बारम्बार ताइवानलाई दबाब दिन खोजेको छ। जसमा यस महिना टापु वरिपरि आयोजित धेरै अभ्यासहरू पनि समावेश छन्।

बिहीबार ताइवानले आफ्नो पहिलो घरेलु पनडुब्बी अनावरण गरेको थियो। सन् २०१६ मा पदभार ग्रहण गरेपछि ताइवानकी राष्ट्रपति साई इङ(वेन यो कार्यक्रम सुरु गर्ने बताएकी थिइन् ।