काठमाडौं ।अमेरिकी कम्पनी एप्पल दक्षिण कोरियाली कम्पनी सामसुङलाई पछि पार्दै विश्वको सबैभन्दा ठूलो स्मार्टफोन निर्माता बनेको छ ।

एप्पलको आइफोन सामसुङका फोनहरुलाई पछि पार्दै सन् २०२३ मा विश्वमा सबैभन्दा धेरै बिक्री हुने स्मार्टफोन बनेको हो । दक्षिण कोरियाको सबैभन्दा ठूलो कम्पनी समेत रहेको सामसुङले सन् २०१० पछि पहिलो पटक शीर्ष स्थान गुमाएको ब्लुमबर्गले उल्लेख गरेको छ ।

‘इन्टरनेसनल डेटा कर्पोरेसन (आइडीसी)’ को तथ्यांक अनुसार गत वर्ष विश्वभर बिक्री भएका फोनहरुमध्ये एप्पलको हिस्सा २०% भन्दा बढी रहेको छ ।

यता, सामसुङको बजार हिस्सा भने १९.४% रहेको छ । एप्पल र सामसुङलाई चिनियाँ फोन निर्माताहरु साओमी, ओप्पो र ट्रान्सियनले पछ्याइरहेका छन् । गत वर्ष सामसुङको बिक्री दोहोरो अंकले घटेपछि शीर्ष स्थान गुमाएको हो ।

गत वर्ष एप्पलले करिब २३ करोड ५० लाख फोन बिक्री गर्दा सामसुङले करिब २२ करोड ६६ लाख फोन बिक्री गर्न सफल भएको थियो । आइडीसीको रिपोर्ट अनुसार सन् २०२३ मा विश्वभर सबै ब्राण्डहरु गरी कुल १।२ अर्ब स्मार्टफोनहरु बिक्री भएका थिए । जुन सन् २०२३ को तुलनामा ३५ कम हो भने एक दशकयताकै न्यून बिक्री हो ।

गत वर्ष धेरै उपभोक्ताहरुले आर्थिक चुनौति र उच्च ब्याजदरहरुको सामना गर्दा फोन बिक्रीमा कमी आएपनि सन् २०२४ मा भने बजार सुधार हुने विज्ञहरुको अनुमान छ ।

ग्राहकहरुले फोल्ड गर्न मिल्ने फोन र आर्टिफिसियल इन्टेलिजेन्स (एआई) क्षमता भएका फोनहरुलाई बढ्दो प्राथमिकता दिइरहेका कारण स्मार्टफोन बजार निकै रोजच समयमा आइपुगेको पनि आइडीसीले उल्लेख गरेको छ ।