काठमाडौं । शिवम् सिमेन्ट्सको लाभांश पािरत गर्न मंगलबार कात्तिक १६ गते साधारण सभा बस्ने भएको छ । शिवमले लगानीकर्तालाई कर सहित २९ प्रतिशत नगद लाभांश दिने भएको छ । गत आर्थिक वर्षको नाफाबाट यसले लगानीकर्तालाई उक्त लाभांश दिन लागेको हो ।

शिवम सिमेन्ट्सले दिन लागेको यो अहिलेसम्मकै धेरै लाभांश हो । गत वर्ष कम्पनीले सेयरधनीलाई २४.२१ प्रतिशत नगद लाभांश वितरण गरेको थियो ।

साधारण सभा सोल्टी होटल सोल्टीमोड काठमाडौंमा बिहान १० बजेदेखि सुरु हुनेछ । कोरोना भाइरसका कारण सभा भर्चुअल माध्यमबाट पनि सञ्चालन हुने कम्पनीले जनाएको छ । सभामा आर्थिक वर्ष २०७७–७८ को वार्षिक प्रतिवेदनमा छलफल हुनेछ ।

सोही आर्थिक वर्षको नाफा नोक्सान, नगद प्रवाहमा पनि छलफल गर्ने एजेन्डा रहेको छ । साधारण सभा तथा लाभांश प्रयोजनका लागि कम्पनीले कात्तिक ८ गते बुक क्लोज गरेको छ । यसर्थ, कात्तिक ७ गतेसम्म कायम सेयरधनीले लाभांश सुरक्षित गरेका छन् ।