काठमाडौँ । कार्ल्सबर्ग ग्रुपले कार्ल्सबर्ग साउथ एसिया प्राइभेट लिमिटेडमा बाँकी रहेको ३३.३३% सेयर आफ्नो  साझेदार  कार्ल्सबर्ग  साउथ  एसिया (सिंगापुर) होल्डिङबाट खरिद गर्ने सम्झौता भएको छ ।

कार्ल्सबर्ग साउथ एसिया कार्ल्सबर्ग इन्डिया र नेपालमा रहेको गोर्खा ब्रुअरी (हाल ९० प्रतिशत सेयर) को होल्डिङ कम्पनी हो ।

यस सम्झौता बमोजिम कार्ल्सबर्ग साउथ एसियाले गोर्खा ब्रुअरीको थप ९.९४%सेयर खरिद गर्ने निश्चित भएको छ ।

प्रस्तावित कारोबारको सम्झौता समाप्ति पश्चात् कार्ल्सबर्गले भारतमा रहेको सम्पूर्ण व्यापारको शतप्रतिशत स्वामित्व प्राप्त गर्ने जनाइएको छ ।

यसैगरी कार्ल्सबर्ग साउथ एसियाको सेयर स्वामित्व मार्फत नेपालमा रहेको गोर्खा ब्रुअरीको ९९.९४ प्रतिशत सेयर स्वामित्व पनि प्राप्त गर्नेछ ।

प्रस्तावित कारोबारको कुल खरिद मूल्य ७४४ मिलियन अमेरिकी डलर रहेको छ । कारोबारको ७४४ मिलियन अमेरिकी डलर मध्ये २०७ मिलियन अमेरिकी डलर रकम हालका लागि कार्ल्सबर्गसँग रहने कार्ल्सबर्ग ग्रुपले जनाएको छ ।

जुन रकम खरिद बिक्री सम्झौताको अधीनमा रहेर आउन सक्ने दाबीको भुक्तानी गरी बाँकी रहेको रकम आगामी ३ देखि ५ वर्षभित्र हस्तान्तरण गरिसक्ने ग्रुपको भनाइ छ ।

प्रस्तावित कारोबारहरू सन् २०२४ को अन्तिम त्रैमाससम्ममा सम्पन्न गरिसक्ने अपेक्षा गरिएको छ । प्रस्तावित  कारोबार हुनका लागि दुई पक्षबिच केही विशेष सर्तहरु पूरा हुनुपर्ने गरी सम्झौता भएको छ ।

यो सम्झौता सम्बन्धि सर्तहरु पूरा गर्नुका साथै नेपालमा कारोबार हुँदा पालना गर्नुपर्ने सरकारी स्वीकृतिका आवश्यक विषयहरु पनि यसमा समावेश छन् ।

प्रस्तावित कारोबारहरूलाई भारतको प्रतिस्पर्धा आयोगले अनुमती दिइसकेको हुनाले कुनै पनि अन्य नियामक ‘एन्टीट्रस्ट अथोरिटी’ को आधार यस कारोबारमा समावेश नहुने ग्रुपको विज्ञप्तिमा उल्लेख छ ।

कार्ल्सबर्ग साउथ एसियाको सेयरहोल्डिङ मार्फत् नेपालमा गोर्खा ब्रुअरीमा रहेको व्यवसाय हाल कार्ल्सबर्ग ग्रुपको खातामा सम्बद्ध कम्पनीको रूपमा वर्गीकरण गरिएको छ । तर कार्ल्सबर्ग साउथ एसियाले गोर्खा ब्रुअरीमा थप ९।९४५ सेयर खरिद गरेपछि पूर्ण रूपमा एकीकृत हुने जनाइएको छ ।

कार्ल्सबर्ग ग्रुपका प्रमुख कार्यकारी अधिकृत जाकोब आरुप एन्डरसनले भने, ‘हामी हाम्रा साझेदारसँग मैत्रीपूर्ण सम्झौतामा पुग्न सक्षम भएकोमा र दुईवटा महत्त्वपूर्ण एसियाली व्यवसायहरूमा पूर्ण नियन्त्रण हासिल गर्न सकेकोमा असाध्यै खुसी छौँ।

हामी यस रोमाञ्चक बियर बजारमा दीर्घकालीन वृद्धिका अवसरहरू हासिल गर्न लगानीलाई तीव्र रूपमा बढाउनेछौँ।’