काठमाडौँ । चालू आर्थिक वर्षको पहिलो महिनामा मुलुकको व्यापार घाटा सवा १ खर्ब १६ अर्बभन्दा बढी देखिएको छ ।

भन्सार विभागले शुक्रबार सार्वजनिक गरेको आयात निर्यातको तथ्याङ्क अनुसार साउनमा १ खर्ब २८ अर्ब ३७ करोड ७१ लाख रुपैयाँ बराबरको वस्तु आयात हुँदा जम्मा १२ अर्ब २२ करोड ६१ लाख रुपैयाँ बराबरको मात्र निर्यात हुन सकेको छ ।

समीक्षा महिनामा वैदेशिक व्यापारतर्फ सरकारलाई खुद १ खर्ब १६ अर्ब १५ करोड रुपैयाँ घाटा लागेको छ । अघिल्लो वर्षको यसै अवधिमा व्यापार घाटा १ खर्ब १५ अर्ब रुपैयाँ बराबर रहेको थियो । तुलनात्मक रूपमा आयात र निर्यात दुवै घट्दा यता व्यापार घाटामा पनि केही कम देखिएको हो ।

भन्सार विभागका अनुसार यस महिनाको आयात र निर्यातको अनुपात (इम्पोर्ट/एक्सपोर्ट रेसियो) १०.५० प्रतिशत देखिएको छ । अर्थात् एक सय रुपैयाँ बराबरको वस्तु आयात हुँदै गर्दा नेपालले जम्मा १०.५० रुपैयाँ बराबरको मात्र निर्यात गरेको छ ।