काठमाडौं । माण्डु हाइड्रोपावर लिमिटेडले चालु आर्थिक वर्षको पहिलो त्रैमाससम्म १२ करोड ७२ लाख रुपैयाँ नाफा कमाएको छ ।

यो गत वर्षको यसै अवधिको भन्दा १३.३२ प्रतिशतले धेरै हो । गत वर्ष यसले ११ करोड २२ लाख ८८ हजार रुपैयाँ नाफा आर्जन गरेको थियो ।

विद्युत बिक्रीबाट हुने आम्दानी बढ्दा यसको नाफामा वृद्धि देखिएको हो ।असोजसम्म यसले २५ करोड १० लाख ७६ हजार रुपैयाँ बराबरको विद्युत बिक्री गरेको छ । गत वर्ष २४ करोड ४० लाख रुपैयाँ थियो ।

यसको वित्तीय खर्च पनि ७ करोड ४१ लाखबाट घटेर ६ करोड ४३ लाख रुपैयाँ कायम भएको छ । हाल यस कम्पनीको चुक्ता पुँजी १ अर्ब ३६ करोड ३६ लाख ३७ हजार रुपैयाँ रहेको छ । यसको सेयर प्रिमियममा १७ करोड १४ हजार रुपैयाँ छ ।

त्यस्तै, रिटेन अर्निङमा ४६ करोड ४७ लाख रुपैयाँ जम्मा छ ।असोजसम्म आइपुग्दा यसको प्रतिसेयर आम्दानी ९ रुपैयाँ ३३ पैसा देखिएको छ । यसको प्रतिसेयर नेटवर्थ भने १४६ रुपैयाँ ५५ पैसा छ। यसले गत भदौ १० गतेदेखि प्रिमियम थप गरी २०६ रुपैयाँका दरले आइपीओ बिक्री गरेको थियो ।

हालसालै यसले गत आर्थिक वर्षको नाफाबाट १० प्रतिशत नगद लाभांश वितरण गर्ने घोषणा गरेको छ । लाभांश प्रस्ताव पारित गर्न मंसिर १५ गते वार्षिक साधारण सभा गर्ने पनि निर्णय गरेको छ ।

साधारण सभा र लाभांश वितरण प्रयोजनका लागि मंसिर ४ गते बुक क्लोज हुनेछ । तसर्थ, मंसिर ३ गतेसम्म कायम रहने सेयरधनी मात्र सभामा भाग लिन र प्रस्तावित लाभांश पाउन योग्य हुनेछन् ।