आर्थिक सञ्जाल । काठमाडौं । माघ १३ अर्थ मन्त्रीबाट डा. युवराज खतिवडा नहटने हल्ला चलेसँगै सेयर बजार ओरालो लागेको छ । खतिवडा अर्थ मन्त्रीबाट हट्दै छन भन्ने हल्ला चलेपछि अघिल्लो दुई साता नेप्से करिव १०० अंकले बढेको थियो । तर, गत सातादेखि अर्थमन्त्री खतिवडा नहटने भन्ने भन्ने समाचार बाहिर आएपछि सेयर बजार पुन ओरालो लाग्न पुगेको छ । साढे १३०० अंकको नजिक पुगेको नेप्से हिजोसम्ममा १२७६.६८ अंकमा आइपुगेको छ । यसरी निरन्तर रुपमा नेप्से घटनुलाई अर्थ मन्त्री खतिवडाको कार्य अवधि थपिने सम्भावना बलियो भएको भन्ने गरिएको छ ।
लगानीकर्ताले अर्थमन्त्री खतिवडालाई रुचाएका छैनन् । सेयर बजारप्रति उदार नभएकाले पनि लगानीकर्ताले यस्तो मानसिकता बनाएका हुन् । उनी अर्थमन्त्री भएदेखि नै सेयर बजार खासै बढन सकेको छैन् । उनले सेयर बजारप्रति लिएको कठोर नीति र बचनले गर्दा लगानीकर्ता उनीप्रति सन्तुष्ट छैनन् । नेपाल कम्युनिष्ट पार्टी (नेकपा) ले राष्ट्रिय सभाका सदस्यमा खतिवडालाई उम्मेदवार नबनाएपछि अर्थ मन्त्रीमा उनको निरन्तरता नहुने संकेत देखिएको थियो । तर अहिले भने उनी जेठसम्म अर्थमन्त्री हुने सम्भावना देखिएको छ ।
खासगरी अर्थमन्त्रीबाट खतिवडा हट्दै छन् भन्ने हल्ला चलाएर सेयर बजार उकालो लागेको थयो । तर, राष्ट्रिय सभा सदस्यमा खतिवडा जुन प्रक्रियाबाट नियुक्त भएका हुन् सोही प्रक्रियाबाट पुनः आउन सक्ने सम्भावना बढेपछि फेरी सेयर बजार ओरालो लाग्न पुगेको बताइन्छ ।
खतिवडा राष्ट्रपतिबाट मनोनीत भएर राष्ट्रिय सभा सदस्य बनेका हुन् । राष्ट्रपतिबाट मनोनीत तीन जनामध्ये खतिवडाको कार्यकाल माघ २० मा सकिँदै छ । रिक्त हुने सो सिटमा खतिवडालाई नै ल्याउने सम्भावना बलियो बन्दै गएको छ ।
राष्ट्रिय सभा सदस्यमा उनको निरन्तरता नभए पनि आगामी २० भदौसम्म उनले अर्थ मन्त्रीका रूपमा काम गर्न पाउने देखिन्छ ।
खतिवडाले आगामी आर्थिक वर्षको बजेट निर्माणको प्रक्रिया सुरु गरिसकेकाले पनि उनलाई तत्काल नहटाउने सम्भावना बलियो बनेको हो । उनी सांसद रहे पनि, नरहे पनि आगामी आर्थिक वर्षको बजेट भने खतिवडाले नै प्रस्तुत गर्ने सम्भावना बढेर गएको छ । यसले गर्दा सेयर बजार घटन गएको बुझाइ ब्रोकरहरुको भनाइ छ ।