काठमाडौं । चालु आर्थिक वर्षको ५ महिनामा राजश्व संकलन लक्ष्यको २७.४५ प्रतिशत भएको छ। वार्षिक बजेटले १४ खर्ब ८० अर्ब रुपैयाँ राजश्व संकलन गर्ने लक्ष्य राखेकोमा ४ खर्ब ६ अर्ब संकलन भएको हो।

यसमा कर राजश्व ३ खर्ब ८२ अर्ब रुपैयाँ संकलन भएको छ भने गैरकर राजश्व २४ अर्ब रुपैयाँ संकलन भएको छ। ५ महिनामा अनुदान वापत ५ अर्ब १२ करोड रुपैयाँ प्रप्त भएको छ। अन्य आम्दानी ३ अर्ब रहेको महालेखा नियन्त्रक कार्यालयले उल्लेख गरेको छ।

सरकारले चालु आर्थिक वर्षमा १९ खर्ब ६४ अर्ब रुपैयाँ खर्च गर्ने अनुमान गरेकोमा कात्तिक मसान्तसम्म ५ खर्ब ६४ अर्ब रुपैयाँ खर्च गरेको छ।

जसमा चालुतर्फ ३ खर्ब ९८ अर्ब रुपैयाँ खर्च भएको छ भने पूँजीगततर्फ ३३ अर्ब ८७ करोड मात्रै खर्च भएको छ।

५ महिनामा चालु खर्च ३३.७ प्रतिशत र पूँजीगत खर्च ८.३ प्रतिशत रहेको छ। वित्तीय व्यवस्थापन तर्फ १ खर्ब ३२ अर्ब रुपैयाँ खर्च भएको कार्यालयले उल्लेख गरेको छ।