काठमाडौं । नेपाल भ्रमणमा रहेको एसियाली पूर्वाधार लगानी बैंक (एआइआइबी) को टोली र नेपाल राष्ट्र बैंकका उच्च अधिकारीहरुबीच भेटवार्ता भएको छ ।

एआइआइबी सञ्चालक समितिका सदस्य आरएमपी रथनायकेको नेतृत्वको उक्त टोलीले गभर्नर महाप्रसाद अधिकारी, डेपुटी गभर्नर बमबहादुर मिश्र र बैंकका अन्य अधिकारीहरुसँग भेटवार्ता गरेको हो ।

भेटका अवसरमा गभर्नर अधिकारीले नेपालको कुल गार्हस्थ्य उत्पादन, मुद्रास्फीति, विदेशी विनिमय सञ्चिति, बाह्य क्षेत्रलगायत मुलुकको वर्तमान आर्थिक स्थितिबारे जानकारी दिएका थिए ।

नेपाल राष्ट्र बैंकको प्रभावकारी नियमन र सुपरिवेक्षकीय भूमिकाले नेपालको समग्र स्थिति सन्तोषजनक रहेको अधिकारीले बताएका थिए ।

लगानी बोर्डका प्रमुख कार्यकारी अधिकृत भइ दोस्रो लगानी सम्मेलन समेत गराएका अधिकारीले नेपालमा वैदेशिक लगानीका लागि राम्रो वातावरण रहेको बताएका थिए ।

अधिकारीले लगानी स्वीकृति प्रक्रिया र संस्थागत व्यवस्थाबारे जानकारी गराएका थिए । नेपालको पूर्वाधार विकासको लागि आन्तरिक स्रोत अपुग रहेको उल्लेख गर्दै उनले एआइआइबी जस्ता संस्थाले जलविद्युत्, प्रसारण लाइनलगायतका पूर्वाधार क्षेत्रमा लगानी गर्न आग्रह गरेका थिए ।

भेटका अवसरमा एआइआइबीको टोली प्रमुख रथनायकेसहित अन्य सदस्यहरूले नेपालमा वैदेशिक लगानीको लागि नीतिगत व्यवस्था, एआइआइबीले लगानी गर्नसक्ने पूर्वाधार क्षेत्र, ऋण स्वीकृति प्रक्रिया र ऋणको ब्याजदरबारे चासो व्यक्त गरेका थिए ।

भेटघाट कार्यक्रम राष्ट्र बैंकका कार्यकारी निर्देशकहरु नेफिल मताङ्गि मास्के, डा। गुणाकर भट्ट, डा. प्रकाश कुमार श्रेष्ठ र गुरुप्रसाद पौडेल उपस्थित रहेको राष्ट्र बैंकले जनाएको छ ।

एसियाली तथा अन्य सदस्य राष्ट्रहरूमा दिगो तथा हरित अर्थतन्त्रमा लगानी गर्ने उद्देश्यले सन् २०१६ एआइआइबीको स्थापना भएको हो । नेपाल यसको सदस्य राष्ट्र हो । यसको मुख्यालय चिनको बेइजिङमा रहेको छ ।