काठमाडौं । एनआइसी एसिया बैंकको गत आर्थिक वर्षको चौथो त्रैमाससम्म आइपुग्दा इम्पेयरमेन्ट चार्ज बढेसँगै खुद नाफा घटेको छ ।

यस अवधिमा खुद नाफा ६८.९१ प्रतिशतले घटेर १ अर्ब ३८ करोड १८ लाख ६९ हजार रुपैयाँमा सीमित भएको छ ।

अघिल्लो वर्षको यसैअवधिमा एनआइसी एसिया बैंकले ४ अर्ब ४४ करोड ४७ लाख ७९ हजार रुपैयाँ खुद नाफा कमाएको थियो ।

अघिल्लो वर्ष ७२ करोड १९ लाख ६२ हजार रुपैयाँ रहेको इम्पेयरमेन्ट चार्ज यो वर्ष २ अर्ब ८४ करोड ४३ लाख २५ हजार रुपैयाँ पुगेको छ ।

खराब कर्जा १.६३ प्रतिशत विन्दुले बढेर १.७४ प्रतिशत पुगेको छ । यसले पनि नाफा प्रभावित भएको हो । साथै, खुद ब्याज आम्दानी र सञ्चालन नाफा दुवै घटेको छ । यसले पनि नाफा घट्न सहयोग पुर्याएको हो ।

खुद ब्याज आम्दानी १३.३९ प्रतिशतले घटेर १० अर्ब ६१ करोड ७१ लाख ७२ हजार रुपैयाँमा सीमित भएको छ । यता, सञ्चालना नाफा पनि ५३।८३ प्रतिशतले घटेर ३ अर्ब १ करोड ८१ लाख ६१ हजार रुपैयाँमा आएको छ ।

असार मसान्तसम्म आइपुग्दा यस बैंकको चुक्ता पुँजी १४ अर्ब ९१ करोड ७५ लाख ६६ हजार रुपैयाँ छ ।

वितरण योग्य नाफा २ अर्ब ३० करोड ४० लाख ५९ हजार रुपैयाँ छ । यता, नाफासँगै प्रतिसेयर आम्दानी पनि घटेको छ । प्रतिसेयर आम्दानी २९ रुपैयाँ १८ पैसाले घटेर ९ रुपैयाँ २६ पैसामा आएको छ । प्रतिसेयर नेटवर्थ २०२ रुपैयाँ २४ पैसा छ ।