काठमाडौं । बैंक तथा वित्तीय संस्थाले आइतबार जेठ २० गते नेपाल राष्ट्र बैंकमा करिब ४० अर्ब रुपैयाँ निक्षेप राखेका छन् ।

बैंक तथा वित्तीय संस्थाले आइतबार मात्रै ३९ अर्ब ७५ करोड रुपैयाँ निक्षेप राखेका हुन् । बैंकिङ प्रणालीमा अधिक तरलता भएपछि बैंक तथा वित्तीय संस्थाले धमाधम केन्द्रीय बैंकमा निक्षेप राख्दै आएका छन् ।

गत फागुन १ गतेबाट केन्द्रीय बैंकले स्थायी निक्षेप संकलन सुविधा कार्यान्वयनमा ल्याएको थियो । उक्त सुविधा ल्याएपछि हालसम्म बैंक तथा वित्तीय संस्थाले केन्द्रीय बैंकमा १५ खर्ब ८० अर्ब भन्दा बढी रकमको निक्षेप सुविधा लिएका छन् ।

बैंक तथा वित्तीय संस्थाले ३ प्रतिशत ब्याजदरमै उक्त निक्षेप जम्मा गरेका हुन् । स्थायी निक्षेप संकलन सुविधा अन्तर्गत बैंकहरुले लगानी गरेर आफूसँग बाँकी रहेको सबै रकम राष्ट्र बैंकमा राख्न सक्छन् । यसरी राखेको रकम ४ दिनसम्म झिक्न मिल्दैन ।