काठमाडौं । नेपालका लागि लिपमोटरको आधिकारिक बिक्रेता साङ्ग्रिला मोटर्स प्रालिले आफ्नो नयाँ प्रिमियम इलेक्ट्रिक एसयूभी ‘B03X प्रो म्याक्स’ (Leapmotor B03X Pro Max) नेपाली बजारमा औपचारिक रूपमा सार्वजनिक गरेको छ ।

ललितपुरको ‘द प्लाजा’ मा आयोजित एक विशेष समारोहका बीच यो गाडी सार्वजनिक गरिएको हो । सो अवसरमा अटोमोबाइल क्षेत्रका प्रतिनिधि, सञ्चारकर्मी र गाडीका सौखिनहरूको बाक्लो उपस्थिति थियो ।

कम्पनीले यस प्रिमियम एसयूभीको मूल्यमा सुरूवाती आकर्षक अफर सार्वजनिक गरेको छ । पहिलो १०० जना ग्राहकका लागि यसको विशेष मूल्य ४४ लाख ९९ हजार रुपैयाँ निर्धारण गरिएको छ । त्यसपछिका ग्राहकका लागि भने गाडीको मूल्य ४६ लाख ९९ हजार रुपैयाँ कायम गरिएको कम्पनीले जनाएको छ । हाल देशभरका शोरुमहरूबाट यसको अवलोकन तथा बुकिङ खुला भइसकेको कम्पनीले जनाएको छ ।

नेपाली भूगोल र सडकलाई मध्यनजर गर्दै निर्माण गरिएको यस लिपमोटर B03X मा १४५ किलोवाट क्षमताको शक्तिशाली मोटर जडान गरिएको छ ।

५३ किलोवाट आवर (kWh) को ब्याट्री प्याक रहेको यस गाडीले एक पटकको फुल चार्जमा ५०५ किलोमिटर (CLTC) सम्मको उत्कृष्ट रेन्ज दिने दाबी गरिएको छ । अफरोड र कच्ची सडकमा समेत सहज यात्राका लागि यसमा १८५ एमएमको ग्राउन्ड क्लियरेन्स दिइएको छ ।

गाडीको इन्टेरियरलाई प्रविधिमैत्री र विलासी बनाइएको छ । यसमा १४.६ इन्चको २.५ एचडी टचस्क्रिन, १२ वटा स्पिकरयुक्त इमर्सिभ साउन्ड सिस्टम र सुरक्षाका लागि अत्याधुनिक ‘लेभल २ एडास’ (Level 2 ADAS) प्रविधि जस्ता विशेषताहरू छन् ।

साङ्ग्रिला मोटर्सका निर्देशक हेमन्त गोल्छाले भने, “B03X को आगमन नेपालको इलेक्ट्रिक मोबिलिटीका लागि एउटा महत्त्वपूर्ण खुड्किलो हो । हामी स्मार्ट र दिगो सवारी अनुभवका लागि नयाँ मापदण्ड  स्थापित गर्ने उद्देश्यका साथ यो एसयूभी नेपाली बजारमा ल्याउन पाउँदा निकै उत्साहित छौं ।”

लिपमोटर विश्वप्रसिद्ध अटोमोबाइल समूह ‘स्टेलान्टिस’ (जसले मासेराटी, अल्फा रोमियो र प्युजो जस्ता ब्रान्ड उत्पादन गर्छ) सँगको सहकार्यमा रहेको ब्रान्ड हो ।

चीनको नम्बर १ न्यु इनर्जी भेहिकल (NEV) स्टार्ट-अप मानिने लिपमोटरले हालसम्म विश्वभर १६ लाखभन्दा बढी गाडी बिक्री गरिसकेको छ ।

जुलाई महिनामा मात्रै यसले १ लाखभन्दा बढी युनिट बिक्री गरी रेकर्ड कायम गरेको थियो । हाल विश्वका ४० भन्दा बढी देशमा यसको सेवा सञ्जाल फैलिएको छ ।