काठमाडौं । ओमोडा एन्ड जेइकोको आधिकारिक वितरक पायोनियर मोटो कर्पले नेपाली बजारमा ‘ओमोडा ई५ प्रो’ सार्वजनिक गरेको छ । कम्पनीले विराटनगरमा हालै एक कार्यक्रम गर्दै यो इलेक्ट्रिक एसयूभी आधिकारिक रूपमा बजारमा ल्याएको हो ।

नेपाली सडकमा १५ सयभन्दा बढी ओमोडा ई५ गुडिरहेको सफलतालाई मध्यनजर गर्दै थप आधुनिक प्रविधि र प्रिमियम फिचरसहित ‘ई५ प्रो’ संस्करण भित्र्याएको कम्पनीले जनाएको छ ।

कम्पनीले ओमोडा ई५ प्रोको आधिकारिक मूल्य सिंगल टोनका लागि ५१.५९ लाख र ड्युअल टोनका लागि ५१.९९ लाख रुपैयाँ निर्धारण गरेको छ । सार्वजनिक भएको अवसरमा विशेष सहुलियत दिँदै पहिलो ५० जना ग्राहकका लागि ४९.९९ लाख रुपैयाँमा गाडी उपलब्ध गराउने कम्पनीले घोषणा गरेको छ । साथै, ती ग्राहकले एक वर्षको निःशुल्क अटो प्लस इन्स्योरेन्ससमेत पाउनेछन् ।

ओमोडा ई५ प्रोमा ५०.७ किलोवाट आवर क्षमताको ब्याट्री र ९९ किलोवाटको मोटर जडान गरिएको छ । जसले २८८ एनएम टर्क पैदा गर्छ । यसले एक पटकको फुल चार्जमा ३५० किलोमिटर (डब्लूएलटीपी) सम्मको रेन्ज दिने कम्पनीको दाबी छ । नेपालका सडक अवस्थालाई ध्यानमा राख्दै यसमा १९१ एमएमको ग्राउण्ड क्लियरेन्स र १८ इन्चको अलोय ह्विल राखिएको छ।

गाडीको भित्री भागमा १५.६ इन्चको विशाल इन्फोटेनमेन्ट डिस्प्ले, आठ वटा सोनी स्पिकर, ड्राइभर मसाज सि, इलेक्ट्रिक सनरुफ जस्ता फिचर छन् । यसमा १९ भन्दा बढी एडास (Advanced Driver Assistance System – ADAS) फिचरहरू र ५४० डिग्री सराउन्ड भ्यू क्यामेरा सिस्टम पनि छ ।