बीवाईडीले आफ्नो  लोकप्रिय एसयुभी एट्टो३ को २०२५ मोडललाई चीनमा रोड टेष्ट गर्न सुरु गरेको छ । नयाँ एट्टो३ यसै वर्षको दोस्रो त्रैमासिकमा लन्च हुने अनुमान गरिएको छ । सो नयाँ मोडलको एक्सटेरियरमा ब्यापक परिमार्जन गरिएको छ ।

चिनियाँ बजारमा यूवान प्लस नामले बिक्री हुँदै आएको सो ईभीमा कम्पनीले नयाँ ड्राइभिङ एसिस्टेन्स सिस्टम दिन लागेको हो । कारको अग्रभागलाई झनै स्पोर्टी देखिने बम्पर राखेर रिडिजाइन गरिएको छ भने पछाडी पनि राम्रैसंग रिफ्रेस गरिएको छ ।

नयाँ एट्टो३ मा रुफ स्पोइलर, ब्रेक लाइट, बडी कलर, रियर पिल्लर र क्यामेरामा समेत नयाँपन पाइनेछ । साथै यसको इन्टेरियरमा पनि राम्रैसंग अपडेट गरिएको अनुमान गरिएको छ ।

सो नयाँ मोडलमा प्रयोग हुने पावरट्रेन र स्पेसिफिकेसन भने पुरानैले निन्तरता पाउने जनाइएको छ । हाल उपलब्ध एट्टो३ लाई बीवाईडीले ४९.९ र ६०.५ किलोवाट आवर ब्याट्री प्याकमा उपलब्ध गराउँदै आएको छ । जसले सिंगल चार्जमा ४३० र ५१० किलोमिटर रेन्ज दिने दाबी गरिएको छ ।

बीवाईडी एट्टो३ नेपाली बजारमा सर्बाधिक बिक्री हुने बिद्युतिय एसयुभी हो । नेपाली बजारमा यसको ४९।९ किलोवाट आवर ब्याट्री प्याक जडित भेरिएन्टलाई ५६ लाख ९० हजार रुपैयाँ पर्छ भने लङ रेन्ज भेरिएन्टको ६७ लाख ८० हजार तोकिएको छ । चीनमा लन्च भए पश्चात यसको नयाँ मोडल नेपाली बजारमा समेत उपलब्ध हुनेछ ।