काठमाडौं । “समृद्धिका लागि सिभिल बैंक” भन्ने नाराका साथ अगाडी बढिरहेको सिभिल बैंक लिमिटेडले आज मंसिर २४ गते देखि “सिभिल बैंक डिबेञ्चर २०८८” सर्वसाधारणहरुकोे लागि विक्री खुल्ला गरेको छ ।

बजारको चल्तीको भन्दा अधिकतम ब्याजदर १०.२५ प्रतिशत रहेको सिभिल बैंक डिवेन्चरको अवधि १० वर्ष रहेको छ । प्रति डिवेन्चर रु. १,००० अंकित मूल्यका ३०,००,००० (तीस लाख) कित्ता डिवेन्चरले हुन आउने रु. ३ अर्ब बरावरको कुल डिवेन्चर मध्ये १२ लाख कित्ता डिवेन्चर अर्थात रु। १ अर्ब २० करोड ऋणपूँजी रकम सर्वसाधारण नेपालीको लागि सार्वजनिक निष्काशनबाट बिक्री गरिने तथा १८ लाख कित्ता डिवेन्चरले हुन आउने रु. १ अर्ब ८० करोड ऋणपूँजी रकम विभिन्न व्यक्ति तथा संघ(संस्थाहरुलाई व्यक्तिगत तवर बाट बिक्री गरिने सो बैंकले जनाएको छ ।

सर्वसाधारणहरुले कम्तिमा २५ कित्ता देखि अधिकतम १२ लाख कित्ता सम्म यस ऋणपत्र खरिद गर्न सक्ने छन् । नेपाल धितोपत्र बोर्डद्वारा स्वीकृत प्रदान गरिएको यस ऋणपत्रमा त्रैमासिक रुपमा व्याज भुक्तानी गरिने जनाएको छ ।

डिवेन्चर नेपाल स्टक एक्सचेन्ज( नेप्से) मा सुचीकृत भई किनबेच समेत गर्न सकिने छ । सर्वसाधारणहरुले आफूले खरीद गर्न चाहेको ऋणपत्र सि–आस्बा सेवामा सहभागी बैंक तथा वित्तीय संस्थाहरु र तिनका शाखा कार्यालयहरु मार्फत दरखास्त फाराम प्राप्त गर्न र बुझाउन सक्ने छन् । ऋणपत्रको निष्काशन आज मंसिर २४ गते खुल्ला भई छिटोमा मंसिर २८ गते तथा ढिलोमा पौष ९ गते बन्द हुने जनाइएको छ ।

बैंकले निष्काशन गर्न लागेको डिवेन्चरको व्याजदर हाल नेपाल स्टक एक्सचेन्जमा सुुचीकृत डिवेन्चरहरुको औसत व्याजदर भन्दा बढी तथा हाल वाणिज्य बैंकहरुले मुद्दती निक्षेपमा प्रदान गरिरहेको व्याजदर भन्दा पनि उच्च रहेको छ ।

यसका साथै अन्य धेरै डिवेन्चरहरु भन्दा फरक यस सिभिल बैंक डिवेन्चरले त्रैमासिक रुपमै व्याज भुक्तानी गर्नेछ । जसले गर्दा लगानीकर्ताले अर्ध वार्षिक भुक्तानी योजना भएकोमा भन्दा अधिक ब्याज आम्दानी प्राप्त गर्नेछ । सामूहिक लगानी कोषको लागि छुट्टयाइएको ५ प्रतिशत डिवेन्चरको लागि २.३ गुणा बढी आवदेन प्राप्त भएको समेत बैंकले जनाएको छ ।