बीवाईडीले बेइजिङ अटो शोमा आफ्नो अत्याधुनिक सुपरकार प्रस्तुत गरेको छ। कम्पनीले डेन्जा जेड नामक इलेक्ट्रिक सुपरकार प्रदर्शन गरेको हो । टप स्पिड, कम तौल र स्मार्ट सिस्टमका कारण सो कार विशेष गरी युरोपेली लक्जरी सुपरकारसँग प्रतिस्पर्धा गर्न तयार पारिएको हो ।

डेन्जा जेडको सबैभन्दा उल्लेखनीय विशेषता यसको तीव्र गति हो । सो कारले २ सेकेन्डभन्दा कम समयमा ० देखि १०० किलोमिटर प्रतिघण्टाको गति लिन सक्छ । सो इलेक्ट्रिक कारको इन्जिनले १,००० भन्दा बढी हर्सपावर उत्पादन गर्ने क्षमता राख्छ । यसले फरारी र बुगाटी जस्ता ब्रान्डसँग प्रत्यक्ष प्रतिस्पर्धा गर्ने लक्ष्य राखेको छ।

यसको सम्पूर्ण बडी र भित्री भाग कार्बन फाइबरबाट निर्माण गरिएको हुँदा यसको तौल निकै कम छ । यो कन्भर्टिबल इलेक्ट्रिक कार हो, जसले आवश्यकता अनुसार यसको छत खुला वा बन्द गर्न सकिन्छ । साथै यसमा एरोडाइनामिक एयर डक्ट प्रयोग गरिएको छ।

बीवाईडीको नयाँ फ्ल्यास चार्जिङ २.० प्रविधिको सहयोगमा सो कार केवल ५ मिनेटमै फुल चार्ज हुन्छ । फुल चार्जमा यसले करिब ५९९ किलोमिटरसम्म दुरी तय गर्न सक्छ । यसमा डिसस एम नामक उन्नत स्मार्ट सस्पेन्सन सिस्टम जडान गरिएको छ, जसले सडकको अवस्थाअनुसार कारको सन्तुलन र आरामलाई अटोमेटिक रूपमा समायोजन गर्छ । हाल सो सुपरकार जर्मनीको प्रसिद्ध नर्बरिङ ट्र्याकमा परीक्षण भइरहेको छ ।