आर्सनलले २० वर्षयता पहिलो पटक इंग्लिस प्रिमियर लिग जित्ने सपनालाई कायम राख्दै शनिबार ब्राइटनमाथि ३–० को प्रभावशाली जित निकालेको छ । यो जितसँगै आर्सनल लिग तालिकाको शीर्ष स्थानमा पनि उक्लेको छ ।

यो जितमा बुकाया साका, काइ हार्भटेज र लियान्ड्रो ट्रोसार्डले गोल गरे । यससँगै आर्सनलको ३१ खेलबाट ७१ अंक भयो । तेस्रोमा रहेको म्यानचेस्टर सिटीले अर्को खेलमा क्रिस्टल प्यालेसलाई ४–२ ले पराजित गर्‍यो । सिटीको ७० अंक छ ।

शनिबारका अन्य खेलमा एभरटनले बर्नलीलाई १–०, न्युकासल युनाइटेडले फुलहमलाई १–०, लुटन टाउनले बर्नमाउथलाई २–१ र वेस्ट ह्यामले उल्भ्सलाई २–१ ले हरायो । एस्टन भिल्ला र ब्रेन्टफोर्डले ३–३ को बराबरी खेले ।