काठमाडौं । नेपाल राष्ट्र बैंकले बजारमा अधिक तरलता भएसँगै १ सातामै ३ पटक निक्षेप तान्न लागेको छ ।  तरलता व्यवस्थापन गर्न २५  अर्ब रुपैयाँको निक्षेप संकलन उपकरण जारी गर्ने भएको छ ।

बैंकले आज बिहीबार मंसिर २१ गते बैंक तथा वित्तीय संस्थाहरुको तरलता खिच्न निक्षेप संकलन मार्फत् २५ अर्ब रुपैयाँ तान्ने भएको हो । इच्छुक बैंक तथा वित्तीय संस्थाले बिहीबार दिउँसो २ बजेसम्म बोलकबोलमार्फत आवेदन दिन सक्नेछन् ।

बजारमा रहेको अधिक तरलता व्यवस्थापनका लागि राष्ट्र बैंकले निक्षेप संकलन उपकरण प्रयोग गर्दै आएको छ ।

केन्द्रीय बैंकले १४ दिनका लागि उक्त उपकरण प्रयोग गर्न लागेको हो । साँवा र ब्याज भुक्तानी मिति पुस ५ गते निर्धारण भएको छ । यसको ब्याजदर भने बोलकबोल बाटै निर्धारण हुनेछ ।

बैंक तथा वित्तीय संस्थाहरुले न्यूनतम १० करोड र अधिकतम ५ करोडले निःशेष भाग जानेगरी निष्कासित रकम बराबरको माग गर्न सक्नेछन् ।

पछिल्लो समय बैंक तथा वित्तीय संस्थाहरुबाट कर्जा प्रवाह हुन सक्दा अधिक तरलताको अवस्था आएको छ ।त्यसैले केन्द्रीय बैंकले धमाधम निक्षेप तानेको हो ।

यो सातामा मात्रै केन्द्रीय बैंकले ३ पटक निक्षेप तान्न लागेको हो । यसअघि मंसिर १७ गते १० अर्ब र मंसिर २० गते पनि १० अर्बको निक्षेप तानिसकेको छ ।