काठमाडौँ । छ वटा ‘ए’ डिभिजन फुटबल क्लबलाई काठमाडौँ महानगरपालिकाले  रु १० लाखका दरले सहयोग रकम प्रदान गरेको छ ।

आज महानगरपालिकाले आयोजना गरेका कार्यक्रममा आफ्नो क्षेत्रभित्र रहेका छ वटा ए डिभिजन क्लबलाई आर्थिक सहयोग रकम हस्तान्तरण गरेको हो ।

नगरप्रमुख विद्यासुन्दर शाक्यले उक्त रकम हस्तान्तरण गरेका हुन् । महानगरले गत वर्ष पनि ए, बी र सी डिभिजन क्लबलाई आर्थिक सहयोग गरेको थियो ।

आज सहयोग पाउने क्लबमा क्रमशः मछिन्द्र क्लब, सरस्वती युवा क्लब, हिमालयन शेर्पा क्लब, एनआरटी, सङ्कटा क्लब र मनाङ मस्र्याङडी क्लब रहेका छन् । सहयोग हस्तान्तरण कार्यक्रममा प्रमुख शाक्यले खेलकुद विकास तथा प्रर्वद्धनका लागि सहयोग रकम हस्तान्तरण गरेको बताए ।

शाक्यले खेलाडीको दैनिकी, व्यायाम र खेलकुदको विकासका लागि खेलकुदलाई शहरी जीवन पद्धति बनाउन महानगरले खेलकुदमा क्रमशः लगानी बढाउँदै लैजाने नीति लिएको पनि जानकारी दिए ।

अखिल नेपाल फुटबल सङ्घ एन्फाका अध्यक्ष कर्मा छिरिङ शेर्पाले महानगरपालिकाले खेल क्षेत्रको विकासका लागि नयाँ कामको थालनी गरेको भन्दै प्रशंसा गरे ।

“डिभिजन क्लबहरुलाई आर्थिक सहयोग गर्ने ऐतिहासिक परम्पराको थालनी काठमाडौँ महानगरपालिकाले गरेपछि अहिले अन्य महानगरपालिकाले पनि त्यसलाई निरन्तरता दिएका छन्” शेर्पाले भने ।

त्यसैगरी मछिन्द्र क्लबका अध्यक्ष प्रवोधवीरसिंह कंसाकारले पनि खेल विकासका लागि महानगरपालिकाले गरेको सहयोगको प्रशंसा गरे । महानगरले उपलब्ध गराएको रकम क्लबहरुले खेलकुद प्रयोजनका लागि मात्र प्रयोग गर्न पाउने छन् ।

क्लबहरुले आयोजना तथा सञ्चालन गर्ने प्रतिस्पर्धामा प्रयोग हुने जर्सी, ट्रयाक, ट्राउजर, फुटबल ब्याग जस्ता सामानमा महानगरको लोगो अङ्कित गर्नु पर्नेछ ।

महानगरको नीति र प्रचलित कानून विपरीत क्लबले काम गरे सम्झौता स्वतः खारेज हुनेछ । यसअघि २०७५ साल भदौ २५ गते प्रत्येक क्लबलाई रु ९ लाख ३० हजार सहयोग रकम प्रदान गरिएको थियो ।

यसैगरी २०७६ वैशाख २३ गते बी र सी डिभिजन क्लबलाई क्रमशः रु तीन लाख र रु दुई लाख सहयोग रकम प्रदान गरिएको थियो ।