आर्थिक सञ्जाल

काठमाडौं । चीनको उत्तर पश्चिम प्रान्त साङ्सीको राजधानीबाट काठमाडौंका लागि कार्गाे रेल छुटेको छ । चिनियाँ सञ्चारमाध्यमका अनुसार नेपालका लागि सियानबाट कार्गो सेवा सुरु भएको हो ।

सिन्ह्वाका अनुसार शुक्रबार सियानबाट पीभीसी पाइप, ग्राउटिङ पाइप, कपडा, जुत्ता र प्रिन्टरहरू बोकेको कार्गोसहितको रेल छुटेको छ । सो रेल तिब्बत स्वायत्त प्रान्तको सिगात्सेसम्म आउनेछ ।

सिगात्सेबाट ट्रकले केरुङ तथा तातोपानी नाका हुँदै मालसामान काठमाडौंसम्म ल्याउने भएको छ । सिन्ह्वाले यसका लागि आठ दिन लाग्ने उल्लेख गरेको छ ।

चाइना रेलवे सिआन ब्युरो ग्रुप कर्पोरेसन लिमिटेड र चाइना रेलवे कन्टेनर ट्रान्सपोर्टेसन लिमिटेडले संयुक्त रूपमा कार्गो रेल संयोजन गरिएको हो ।

चिनियाँ सञ्चारमाध्यमले सान्सी प्रान्तबाट दक्षिण एसिया लक्षित मालवाहक रेल सञ्चालन गरेको यो पहिलो पटक भएको जनाएका छन् । चिनियाँ रेलवे सिआन ब्युरो ग्रुप कर्पोरेसन लिमिटेडको सिआन पश्चिम रेलवे स्टेसनले काठमाडौं पुग्ने नयाँ गन्तव्य स्टेसन सुरु गरेको जनाएको छ ।

नेपालको दक्षिणी छिमेकी राष्ट्र भारतसँग सीमा विवाद चर्किरहेको बेला उत्तरी छिमेकी राष्ट्र चीनले भने नेपालका लागि कार्गो रेल सेवा सुरु गरेको हो । चीनले सुरु गरेको कार्गो रेल सेवालाई चीनले अघि सारेको बेल्ट एन्ड रोड इनिसिएटिभका रूपमा चित्रण गरिएको पाइएको छ ।

भारतले पाँच वर्षअघि नेपालमाथि अघोषित नाकाबन्दी गर्दा प्रधानमन्त्री केपी शर्मा ओली नेतृत्वको सरकारले नै चीनसँगका नाका खोल्ने निर्णय भएको थियो ।

चीनसँग अन्तर्राष्ट्रिय व्यापारमा भारतसँगको निर्भरता हटाउने प्रयासअन्तर्गत चीनका समुद्री र सुक्खा बन्दरगाह भएर तेस्रो देशसँग व्यापार गर्न नेपालले अघिल्लो वर्ष हिमालयपार व्यापार तथा पारवहन सम्झौता गरेको थियो । सो सम्झौता अहिले आएर व्यवहारमै कार्यान्वयन हुन लागेको हो । आजको राजधानी दैनिकबाट