आर्थिक सञ्जाल चैत्र २९, २०७६ शनिबार

काठमाडौँ । सहरी विकास राज्यमन्त्री रामवीर मानन्धरले उपत्यकाका १८ वटै स्थानीय तहमा क्वारेन्टाइनको व्यवस्थापनका विषयमा शुक्रबार छलफल गर्नुभएको छ ।

सरकारले क्वारेन्टाइन व्यवस्थापन तथा सञ्चालन कार्यविधि अनुसार स्थानीय तहले काम गरे नगरेको विषयमा अनुगमन समेत थालिने जनाइएको छ ।
मन्त्रिपरिषद् बैठकले राज्यमन्त्री मानन्धर र स्वास्थ्य तथा जनसङ्ख्या राज्यमन्त्री नवराज रावतलाई अनुगमन र सहजीकरणको जिम्मेवारी दिएको थियो ।

राज्यमन्त्री मानन्धरले उपत्यकाका १८ वटै नगरप्रमुख, तीनै जिल्लाका प्रमुख जिल्ला अधिकारी तथा नेपाली सेनाका क्वारेन्टाइन व्यवस्थापनमा खटिएका पृतनापतिसँग छलफल गर्नुभएको हो ।

छलफलमा राज्यमन्त्री मानन्धरले क्वारेन्टाइन व्यवस्थापन तथा सञ्चालनबारे जानकारी लिन आज शनिबारदेखि अनुगमन गरिने जानकारी दिनुभएको राज्यमन्त्री मानन्धरको सचिवालयले जनाएको छ ।
राज्यमन्त्री मानन्धरले विपद्को सामना गर्न स्थानीय तहले गम्भीर तयारी गर्नुपर्नेमा जोड दिनुभयो । राज्यमन्त्री मानन्धरले उपत्यकाको क्वारेन्टाइनको अवस्था र तयारीबारे दुई दिन भित्र मन्त्रिपरिषद्लाई जानकारी दिनुपर्ने बताउनुभयो । हालसम्म भक्तपुरको कृषि तालिम केन्द्रमा ६० बेड, खरिपाटीमा १७५ बेड तथा खानेपानी तालिम केन्द्रमा ७० बेडको क्वारेन्टाइन तयारी अवस्थामा रहेको छ ।

यस्तै, ललितपुरको जावलाखेल स्थित स्टाफ कलेजमा एक सय बेड तथा काठमाडौँको पशुपतिमा ७० बेड क्षमताको क्वारेन्टाइन रहेको छ ।