काठमाडौं ।  कोटा गुठी भवनको आज उद्घाटन भएको छ । काठमाडौं महानगरको वडा नं. ५ कोटाटोलमा पुननिर्माण भएको गुठी घर नेकपा एमालेका वरिष्ठ उपाध्यक्ष एवं संघीय संसद सदस्य ईश्वर पोखरेल र महानगरका मेयर विद्यासुन्दर शाक्यले संयुक्त रुपमा उद्घाटन गर्नुभएको हो ।

त्यस अवसरमा वडाध्यक्ष रमेश डंगोल, वडा सदस्यहरु, उपभोक्ता समितिका पदाधिकारीहरु तथा स्थानीय उपस्थित हुनुहुन्थ्यो । हाँडी गाउँमा बसोबास गर्ने नेवार समुदायको व्यक्तिको मृत्यु हुँदा अन्तिम संस्कार गर्ने ८ वटा च्या गुठी छन् । तीमध्ये कोटा गुठी एक हो । यस गुठीमा डंगोल र महर्जन परिवारका १६ गुठीयार हुनुहुन्छ ।

हाँडीगाउँका यी गुठीहरुलाई लिच्छवीकालीन मानिन्छ । कोटा गुठीमा यमरी पुन्हीको अघिल्लो दिन विशेष पूजा गरिन्छ ।

उद्घाटन कार्यक्रममा बोल्दै नेता पोखरेलले, समुदायको अस्तित्व बचाउन संस्कृति बच्नु पर्ने धारणा राख्नुभयो । ‘हतियारले समुदायको अस्तित्व समाप्त हुँदैन । संस्कृतिको विनाशले हुन्छ । त्यसैले समुदाय बचाउन संस्कृति बचाउनु पर्छ ।’ उहाँको धारणा थियो ।

त्यस क्रममा बोल्दै महानगरका मेयर विद्यासुन्दर शाक्यले, महानगरभित्रका पुननिर्माण गरिएका कुनै पनि सम्पदाको मौलिकता नबिगारिएको बताउनुभयो । ‘सम्पदाको मौलिकता विगार्नु हुँदैन । आवश्यकता आधारमा सुधार गर्न सकिन्छ । हामीले कार्यकालको सुरुदेखि भन्दै आएका हौँ । यसै अनुसार काम पनि गर्दै आएका छौँ ।’

‘सम्पदा पुननिर्माण जस्ता काम थालनी जहिले पनि गर्न सकिन्छ । यसलाई यो वा त्यो वहानामा रोक्नु पर्दैन ।’ मेयर शाक्यले भन्नुभयो, ‘सम्पदा पुननिर्माण गर्न, संस्कार, संस्कृति र परम्परालाई बचाउन महानगर आफैँले पैसा खर्च गर्न सक्छ । कसैसँग माग्नु पर्दैन ।

’वडाले मोक्ष गुठीको पुननिर्माण अन्तिम चरणमा पुर्‍याएको छ । कार्यक्रममा वडाध्यक्ष रमेश डंगोलले भन्नुभयो, ‘यसका लागि वडाबाट ५१ लाख रुपैयाँ छुट््याएका थियौँ । यो गुठी हाँडीगाउँ द्य छेँभित्र छ ।

कोटा गुठी ४६ लाख रुपैयाँ लागतमा पुननिर्माण भएको हो । यो २ तले छ । उपभोक्ता समितिका अध्यक्ष शुभनारायण डंगालले, महानगरको सहयोगबाट गुठीलाई ठूलो उपलब्धी हासिल भएको बताउनुभयो ।