काठमाडौं । गैर आवासीय नेपाली सङ्घ एनआरएनएले निर्वाचन कार्यक्रम सार्वजनिक गरेको छ। प्रतिनिधि विवादका कारण परराष्ट्र मन्त्रालयले तत्काल अधिवेशन नगर्न निर्देशन दिए पनि एनआरएनएको निर्वाचन समितिले डिसेम्बर २८ र २९ गते संघको वार्षिक साधारण सभाबाट नेतृत्व चयन गर्ने तालिका सार्वजनिक गरेको छ।

समितिले डिसेम्बर ६ मा मतदाता नामावली प्रकाशन गर्ने, ७ मा नामावली माथि दाबी विरोध गर्ने र डिसेम्बर १० मा मतदाताको अन्तिम नामावली प्रकाशित गर्ने जनाएको छ। डिसेम्बर ११ मा उम्मेदवारले मनोनयन पत्र दर्ता गर्ने र डिसेम्बर २६ र २७ मा अनलाइनमार्फत मतदान गर्ने तालिका निर्वाचन समितिले सार्वजनिक गरेको छ।

समितिले गैर आवासीय नेपाली संघको अध्यक्षमा मनोनयन पत्र दर्ता गर्न १० लाख रुपैयाँ तोकेको छ। यस्तै उपाध्यक्षमा ७ लाख, महासचिवमा ६ लाख, सचिव र कोषाध्यक्षमा मनोनयन दर्ता गर्न ५/५ लाख रुपैयाँ शुल्क बुझाउनु पर्ने जनाएको छ।

यसैगरि सहकोषाध्यक्ष पदमा ४ लाख, महिला संयोजक, युवा संयोजक र क्षेत्रीय संयोजक पदमा उम्मेदवार मनोनयन गर्न ३ लाख ५० हजार शुल्क तोकिएको छ।

यस्तै क्षेत्रीय उप संयोजक, महिला संयोजक र युवा संयोजक पदमा उम्मेदवार मनोनयन गर्न २ लाख ५० हजार रुपैयाँ शुल्क बुझाउनु पर्नेछ।

क्षेत्रीय महिला उपसंयोजक र युवा संयोजकले २ लाख रुपैयाँ शुल्क बुझाउनु पर्ने एनआरएनएको निर्वाचन समितिका प्रमुख निर्वाचन अधिकृत लीलामणि पौडेलले निकालेको सूचनामा उल्लेख गरिएको छ।