कोरोना महामारी फेरि बढयो,अस्पतालका वेड भरिन थाले
काठमाडौं। उपत्यकामा कोरोना भाइरसको संक्रमण बढेसँगै सरकारी अस्पताल भर्ना हुने बिरामी पनि बढेका छन् । निषेधाज्ञा खुकुलो भएसँगै जनस्वास्थ्यका मापदण्डमा कडाई नहुँदा केही दिनयता दिनहुँजसो अस्पतालमा कोरोना बिरामीको चाप बढेको छ ।
कोभिड–१९ युनिफाइड केन्द्रीय अस्पताल (वीर अस्पताल), शुक्रराज ट्रपिकल तथा सरुवा रोग अस्पताल, सशस्त्र प्रहरी बल अस्पताल, पाटन अस्पताल, शिक्षण अस्पताल लगायतका सरकारी अस्पतालमा बिरामीको संख्या दिनानुदिन बढ्दै गइरहेको छ ।
दैनिक संक्रमित बढेपछि कोभिड–१९ उपचारका लागि छुट्याइएका सघन उपचारकक्ष (आइसीयु) , हाइडिपेन्डेन्सी युनिट (एचडीयु), भेन्टिलेटर र साधारण शैय्या भरिएका छन् । सशस्त्र प्रहरी बल अस्पतालमा पनि सबै वेड भरिएका छन्।
११ दिन यतादेखि बिरामीको संख्या बढ्दै गएपछि वेड भरिएका छन् । संक्रमितहरु आउने क्रम बढेकाले सशस्त्र प्रहरी अस्पतालसँग भएका २०० वेड भरिने अवस्थामा पुगेको छ। अहिले बिरामी पनि पहिलेका जस्तै श्वास फेर्न गाह्रो हुने, ज्वरो आउने समस्या रहेको पाइएका छन ।
सशस्त्र प्रहरी अस्पतालको आइसीयूमा २०, एचडीयूमा ५० र साधारण वेडमा १ सय ३० जना बिरामी रहेका छन् । अहिले संक्रमणको दोस्रो लहर चलिरहेको छ । दोस्रो लहर गत चैतबाट सुरु भएको थियो । दोस्रो लहरमा धेरै बिरामी बढेका थिए ।
दोस्रो लहरमा संक्रमितलाई ज्वरो आउने, निमोनिया हुने, श्वासप्रश्वासमा समस्या आउनेजस्ता समस्या देखिएको थियो । संक्रमणको दोस्रो लहर गत वैशाख अन्तिम सातामा उच्च विन्दुमा पुगेको थियो । स्वास्थ्य तथा जनसंख्या मन्त्रालयले निषेधाज्ञा खुला राखेर जनस्वास्थ्यका मापदण्ड लागू नगरेमा असोज १५ पछि संक्रमणको तेस्रो लहर आउने चेतावनी दिइएको छ ।
कोभिड–१९ युनिफाइड केन्द्रीय अस्पतालमा पनि विगत दुई हप्तादेखि संक्रमितको संख्या बढ्दै गएको छ । निषेधाज्ञा खुकुलो भएको, भीडभाड बढेको र जनस्वास्थ्यका मापदण्ड पालना नगर्दा बिरामी बढ्दै गएको देखिन्छ।
यस अस्पतालमा अहिले करिव १०० बिरामी रहेका छन् । तीमध्ये ३५ जना आइसीयू र ४ जना भेन्टिलेटर र अन्य साधारण वेडमा रहेका छन् । संक्रमित बढ्ने जोखिमलाई ध्यानमा राखेर यस अस्पतालले एक हजार वेड थप्न तयारी अवस्थामा राखेको छ । यहाँ एक सय आइसीयू र १०० भेन्टिलेटर रहेका छन् ।
संक्रमणको रोकथाम र नियन्त्रणका लागि अस्पतालमा २० टनको तरल अक्सिजन र दुईवटा अक्सिजन प्लान्ट जोडिएको छ । यस्तै थप एकवटा अक्सिजनको प्लान्ट जोड्ने तयारीमा अस्पताल प्रशासन रहेको छ ।
शुक्रराज अस्पतालका निर्देशक डा।अनुप बाँस्तोलाले निषेधाज्ञा खुलेसँगै बिरामी बढ्दै गएको बताएका छन्। यश अस्पतालमा अहिले २२ जना आइसीयू, २० भेन्टिलेटर र ३५ जना कोभिड–१९ वेडमा रहेका छन् ।
यस्तै पाटन अस्पतालका कोभिड–१९ सम्पर्क व्यक्ति डा।आशिष श्रेष्ठका अनुसार कूल १ सय ५१ बिरामीमध्ये २१ आइसीयूमा र १० भेन्टिलेटरमा रहेका छन् । यस्तै विगत २४ घण्टामा पाटन अस्पतालमा २२ संक्रमित भर्ना भएका छन् । पाटनमा ३० आइसीयू, १५ भेन्टिलेटर वेड रहेका छन् ।
काठमाडौँ उपत्यकामा ८ हजार ८ सय ९५ सक्रिय संक्रमित रहेका छन् । देशभरि १ सय ५७ अस्पताल कोभिड–१९ का लागि सूचीकृत गरिएका छन् । ती अस्पतालमा २ हजार ६०० आइसीयू रहेका र ६ सय ३० थप गर्ने प्रक्रियामा छन् ।
यस्तै ९०० भेन्टिलेटर र २ हजार ७५ हाइकेयर वेड रहेका छन् । उपत्यकाका सरकारी अस्पतालमा ३ सय ११ आइसीयू र १ सय ३९ भेन्टिलेटर र साधारणसँगै एचडीयू २ हजार ६६ वेड रहेका छन् ।
देशभरिमा ६ सय ९० जना आइसीयु र १ सय ७५ भेन्टिलेटर, ३ हजार २ सय २४ जना संस्थागत आइसोलेशन र २८ हजार ४ सय ५ जना होम आइसोलेसनमा रहेका छन् ।
त्रिवि शिक्षण अस्पतालमा पनि कोरोना वेड भरिन थालेका छन । यश अस्पतालमा अहिले १ सय २२ जना संक्रमित बिरामी उपचाररत रहेका छन । तीमध्ये ९१ जना साधारण वेडमा, अक्सिजन दिएर आइसीयूमा ११ र भेन्टिलेटरमा १८ र दुई जना आकस्मिक सेवामा उपचार गराइरहेका छन् ।
बिरामी आउन थालेकाले अब २२ वटा साधारण वेड र एक वटा मात्र आइसीयू वेड खाली रहेकाले महामारी बढेमा उपचारमा कठिनाइ हुन जानेछ । अस्पतालमा १ सय ४५ वेड कोभिड–१९ का संक्रमितका लागि छुट्याइएको छ । त्रिवि शिक्षण अस्पतालमा पाँच एचडीयु र २२ आइसीयू बालबालिकाका लागि छुट्याइएको छ ।
स्वास्थ्य मन्त्रालयका सहप्रवक्ता डा. समिरकुमार अधिकारीले भीडभाड बढेकाले संक्रमितसँगै बिरामी पनि बढेको बताएका छन । अहिले केही दिनयता समाजमा संक्रमण बढेका पाइएको छ। संक्रमितहरु दिनप्रतिदिन बढेका छन् । निषेधाज्ञा खुकुलो भए पनि सबैले जनस्वास्थ्यका मापदण्ड लागू गर्न आग्रह गरेका छन्।