काठमाडौँ । जापानले नेपाललाई कोभ्याक्स कार्यक्रम मार्फत करिब १६ लाख डोज कोरोना खोप दिने भएको छ ।

काठमाडौँस्थित जापानी राजदूतावासले प्रेस विज्ञप्ति जारी गर्दै नेपाललाई १६ लाख डोज खोप प्राप्त हुने बताएको छ ।  यसअघि जापानका विदेशमन्त्री तोसिमित्सु मोटेगीले नेपालल गायत एसियाली मुलुकहरुलाई १ करोड १० लाख डोज कोरोना खोप अनुदानमा दिने घोषणा गरेका थिए । सोही खोप मध्येको १६ लाख डोज खोप नेपालले पाउन लागेको हो ।

जापानले नेपाललाई एस्ट्राजेनेका र अक्सफोर्ड युनिभर्सिटीले विकास गरेको खोप दिन लागेको हो । यो खोप कोभिशिल्ड खोपको पहिलो डोज लगाएका ज्येष्ठ नागरिकले पनि लगाउन मिल्छ ।

जापानी दूतावासका अनुसार उक्त खोप नेपालले जुलाईको मध्यदेखि एक महिनाभित्र बिचमा प्राप्त गर्नेछ । यद्यपि खोप आउने तालिका भने अन्तर्राष्ट्रिय सङ्गठनसँगको खरिद सम्झौता पूरा भएपछि मात्र सार्वजनिक गरिने दूतावासले सार्वजनिक गरेको विज्ञप्तिमा उल्लेख गरिएको छ ।

नेपालका लागि जापानी राजदूत युटाका किकुटाले खोप अनुदानमा दिने निर्णयले नेपाल र जापानको लामो समयदेखिको मैत्री सम्बन्ध झल्किएको बताएका छन् । उनले धेरै नेपालीको जीवन रक्षाको लागि अत्यावश्यक रहेको खोप दिने जापानको निर्णयको स्वागत पनि गरेका छन् ।

दूतावासले यो खोप जापानबाट ल्याउने र नेपालमा वितरण गर्ने कार्यमा स्वास्थ्य तथा जनसङ्ख्या मन्त्रालयसँग सहकार्य गर्ने उल्लेख गरेको छ ।

नेपालले भारतबाट खरिद गरेको खोप नआएको कारण दोस्रो डोज खोप लिन नपाएका मानिसलाई र खोपको पर्खाइमा रहेका अन्य युवाहरूका लागि जापानले दिन लागेको खोप निकै महत्त्वपूर्ण हुने राजदूत किकुटाले बताएका छन् ।