काठमाडौं । नेपाल पत्रकार महासङ्घले कोरोना महामारीको समयमा पत्रकारलाई कामबाट ननिकाल्न निजी सञ्चार गृहहरूलाई चेतावनी दिएको छ । कोरोना महामारीको दोस्रो लहरमा पनि निजी सञ्चार गृहहरूले श्रमजीवी पत्रकारलाई निकाल्न थालिएको सूचना आएको भन्दै महासङ्घले कुनै पनि बहानामा पत्रकारको रोजगारी नखोस्न चेतावनी दिएको हो ।

नेपाल पत्रकार महासङ्घका महासचिव रोशन पुरीले कोरोना महामारीका बेला कुनै पनि बहानामा पत्रकारलाई निष्कासन नगर्न आग्रह गर्नुभयो । उहाँले कोभिड १९ को पहिलो लहरमा जस्तै दोस्रो लहरमा पनि पत्रकारलाई निष्कासन गर्न सुरु गरिएको र निष्कासित भएका पत्रकारका निम्ति महासङ्घले कानुनी लडाइँ लड्नुको साथै दबाबमूलक काम गरिरहेको बताउनु भयो ।

महासङ्घले कोभिडको दोस्रो लहरमा निष्कासनमा परेका नौ जनाको पुनर्नियुक्ति समेत गराएको महासचिव पुरीले जानकारी दिनुभयो । त्यसैगरी पाँच सञ्चार माध्यमलाई सात दिनभित्र पत्रकारको समस्या समाधान गर्न अल्टिमेटम दिएको पनि उहाँले जानकारी दिनुभयो ।

पुरीले भन्नुभयो, ‘सञ्चार माध्यमबाट पत्रकार निकालिन थालेका छन् । दोस्रो लहर सुरु भइसकेपछि हामीले नौ जनाको पुनर्नियुक्ति गरी समस्या समाधान गरेका छौँ । कानुनी लडाइँ र अन्य हिसाबले दबाबमूलक काम पनि पत्रकार महासङ्घले गरिरहेको छ ।

श्रम समस्यासँग जोडिएका पाँच सञ्चार माध्यमलाई सात दिनभित्र समस्या समाधान गर्न आग्रह पनि गरेका छौँ । अर्थ मन्त्रालय, सञ्चार मन्त्रालय, विभिन्न विभागलाई भेटेर विस्थापित भएकालाई पुनर्स्थापित गर्ने, पेसामा रहेकालाई पेसामा सुनिश्चितता गर्न मन्त्रालयमार्फत दबाब दिएका छौँ ।’

महासचिव पुरीले ऐन बनाउने र कार्यान्वयन नगर्ने विडम्बनाबाट सरकार माथि उठ्नुपर्ने आवश्यकता रहेको बताउनुभयो । महासङ्घले महामारीको समयमा पत्रकार फ्रन्टलाइनमा बसेर काम गरिरहेको भन्दै फ्रन्ट लाइनरको परिभाषा भित्र पत्रकारलाई पनि समेटेर त्यही प्रकारको सेवा, सुविधा र व्यवहार गर्न पनि सरकारसँग आग्रह गरेको छ ।

महासचिव पुरीले भन्नुभयो ‘सरकारलाई बारम्बार आग्रह गरेका छौँ । फ्रन्टलाइनरको परिभाषाभित्र स्वास्थ्यकर्मी, चिकित्सक, सुरक्षाकर्मी र पत्रकार लगायत सरसफाइकर्मीलाई एकै ठाउँमा राखेर सेवा, सुविधाको व्यवस्थापन र त्यही खालको समतामूलक व्यवहार गर्नुपर्छ भन्ने आग्रह गरेका छौँ ।’

पत्रकार महासङ्घले कोरोना सङ्क्रमित पत्रकारलाई उपचारका लागि सहजीकरण पनि गरिरहेको छ । पत्रकार महासङ्घको केन्द्रीय कार्यालयमा रहेको आवास गृहमा आइसोलेशन बेड निर्माण गरेको गरिएको छ ।

त्यसैगरी दाङ, रोल्पा, कपिलवस्तु, पाल्पा, गुल्मी, अर्घाखाँची, प्युठान, बाग्लुङ, पर्वत लगायतका जिल्लामा अक्सिजन, चिकित्सकसहितको आइसोलेशन सेन्टर बनाएर उपचार गर्ने वातावरण बनाएको महासचिव पुरीले जानकारी दिनुभयो ।

काठमाडौं उपत्यकामा सङ्क्रमित पत्रकारका लागि बेड, अक्सिजन, औषधि खोज्ने र बाहिरी जिल्लाबाट रिफर भइ आएका पत्रकारलाई काठमाण्डौमा बेड मिलाउने, आईसीयू, भेन्टिलेटर मिलाउने जस्ता काम महासङ्घले गरिरहेको उहाँले बताउनुभयो ।

महासङ्घका अनुसार, जेठ २ गतेसम्म देशभर गरी झन्डै आठ सय जना पत्रकार कोरोना सङ्क्रमित भएका छन् । अहिले दुई सय ५० भन्दा बढी सक्रिय सङ्क्रमित छन् ।

४० जनाको अस्पतालमा उपचार भइरहेको छ । ६ जनाको आईसीयू र भेन्टिलेटरमा उपचार भइरहेको छ भने सङ्क्रमणबाट १३ जना पत्रकारले ज्यान गुमाएका छन् ।