कोरोनाको त्रासले ‘दोस्रो टोखा नगर महोत्सव’ स्थगित

आर्थिक सञ्जाल आइतबार, १८ फागुन २०७६
काठमाडौँ । टोखा नगरपालिकाले यही फागुन २३ देखि २५ गतेसम्म आयोजना गर्न लागेको ‘दोस्रो टोखा नगर महोत्सव–२०७६’ स्थगित भएको जनाएको छ । नगर प्रमुख प्रकाश अधिकारीले कोरोना भाइरस जोखिमका कारण महोत्सव स्थगित गरिएको जानकारी दिए ।
“विश्व स्वास्थ्य सङ्गठनले जारी गरेको सूचना अनुसार भारत लगायत नेपालमा पनि उच्च जोखिम रहेकाले हालका लागि महोत्सव स्थगित गरेका हौँ”, उनले भने । नगरपालिकाले महोत्सवको तयारीका लागि विभिन्न समिति तथा उपसमिति निर्माण गरेर प्रचार–प्रसारलाई तीव्र बनाएको थियो ।
नेपाल भ्रमण वर्षको अवसरमा आन्तरिक तथा बाह्य पर्यटकलाई टोखा चिनाउनका लागि नेवाः गुठी टोखाको व्यवस्थापनमा महोत्सव हुन लागेको थियो । महोत्सव सम्पन्न गर्नका लागि चालू आर्थिक वर्षमा रु २५ लाख विनियोजन गरेको छ ।