ललितपुर। ललितपुर महानगरपालिकाले जाँड रक्सीको विज्ञापन गरिएका होर्डिङ बोर्ड हटाउन थालेको छ । आज शुक्रबारदेखि नैअभियान चलाएर होर्डिङ बोर्ड हटाउन थालेको ललितपुर महानगरपालिकाका नगर प्रहरी प्रमुख सीताराम हाछेथुले जानकारी बताए ।

‘ललितपुर महानगरलाई सफा र स्वच्छ बनाउन जाँड, रक्सीको विज्ञापन गरिएका होर्डिङ बोर्ड हटाउन सुरु भइसकेको छ, केही दिनमा यो अभियान सकिने छ’, हाछेथुले भन्नुभयो ।

यसअघि ललितपुर महानगरपालिकाका सडक पेटी अतिक्रण विरुद्धको अभियान चलाइएको थियो । फुटपाथ कब्जा गरी सञ्चालन भइरहेका व्यापार, व्यवसाय हटाएर समग्र फुटपाथ व्यवस्थापन गर्ने तयारी भएको नगर प्रहरी बलका प्रमुख हाछेथुले बताए ।

ललितपुर महानगरपालिकाले हाछेथुलाई गत भदौ १४ गते ललितपुर नगर प्रहरी प्रमुखमा नियुक्त गरिएको थियो ।