काठमाडौं । सरकारले भदौ १६ गतेदेखि नियमित उडान सुरु गर्ने निर्णय गरेको छ । बिहीबार बसेको मन्त्रिपरिषद् बैठकले पीसीआर परीक्षण सहज भएका देशहरुबाट शर्त सहितको नियमित उडान गर्ने सञ्चालन गर्ने निर्णय गरेको सरकारका प्रवक्ता एवं सञ्चार र अर्थमन्त्री डा. युवराज खतिवडाले जानकारी दिए ।

पीसीआर टेष्ट सहज नभएका मुलुकहरुमा नियमित उडान नहुने बताउँदै उनले त्यस्ता ठाउँमा आवश्यकता अनुसार चार्टर फ्लाइट मात्र सञ्चालन हुने जानकारी दिए ।

दैनिक ५०० यात्रु नकट्ने गरी संस्कृति पर्यटन तथा नागरिक उड्यन मन्त्राललयले उडान तालिका बनाउने उनले बताए । यसरी हुने उडानमा नेपाली नागरिक, कूटनीतिक नियोगका कर्मचारीहरु आउन सक्नेछन् ।

स्वदेश आउनेहरुले ७२ घण्टाभित्रको पीसीआर टेष्ट गर्दाको नेगेटिभ रिपोर्ट देखाउनुपर्नेछ ।

काठमाडौंमा आएपछि ७ दिन आफ्नै खर्चमा होटल क्वारेन्टिनमा बस्नुपर्ने र होटल क्वारेन्टिनमन बस्ने खर्च टिकट काट्दै सम्बन्धीत एयरलाईन्सलाई बुझाउनुपर्ने खतिवडाले जानकारी दिए ।

पीसीआर टेष्ट गरेका र नगरेका यात्रुहरु एउटै विमानमा आए सबैलाई क्वारेन्टिनमा राखिनेछ र त्यसको सबै खर्च एयरलाइन्सले व्यहोर्नुपर्छ ।