काठमाडौँ । सशस्त्र प्रहरी बल (एपीएफ) नेपालले सात जना सशस्त्र प्रहरी नायब महानिरीक्षक (डिआईजी)को सरुवा तथा सात जनाको पदस्थापन गरेको छ ।

गृह मन्त्रालयको बिहीवार(आज)को निर्णय अनुशार सप्रनामनिहरुको सरुवा र पदस्थापन गरिएको हो । सरुवासँगै विभिन्न विभाग, बाहिनी मुख्यालय, मानवस्रोत व्यवस्थापन, सीमा सुरक्षा, कार्य विभाग तथा एपीएफ इन्टेलिजेन्स ब्युरोमा जिम्मेवारी हेरफेर गरिएको छ ।

सरुवा हुने डिआईजीमध्ये सुरेश कुमार श्रेष्ठलाई नम्बर १ पशुपतिनाथ बाहिनी मुख्यालय, काठमाडौंबाट प्रधान कार्यालयको सीमा सुरक्षा विभागमा ल्याइएको छ । दीपेन्द्र शाहलाई नम्बर ४ मुक्तिनाथ बाहिनी मुख्यालय, कास्कीबाट एपीएफ इन्टेलिजेन्स ब्युरोमा सरुवा गरिएको छ ।

त्यसैगरी दीपक अधिकारीलाई सीमा सुरक्षा विभागबाट नम्बर ५ विन्ध्यवासिनी बाहिनी मुख्यालय, रुपन्देही पठाइएको छ भने कृष्ण ढकाललाई नम्बर २ छिन्नमस्ता बाहिनी मुख्यालय, महोत्तरीबाट प्रधान कार्यालयको कार्य विभागमा सरुवा गरिएको छ ।

डिआईजी दीपेन्द्र कुँवरलाई नम्बर ५ विन्ध्यवासिनी बाहिनी मुख्यालयबाट मानवस्रोत विभागमा ल्याइएको छ । विष्णु प्रसाद भट्टलाई प्रधान कार्यालयस्थित सशस्त्र प्रहरी महानिरीक्षकको कार्यालयबाट नम्बर २ छिन्नमस्ता बाहिनी मुख्यालय, महोत्तरी पठाइएको छ भने कृष्णराज पाठकलाई मानवस्रोत विभागबाट नम्बर ६ महेश्वरी बाहिनी मुख्यालय, सुर्खेत सरुवा गरिएको छ ।

यस्तै पदस्थापनतर्फ डिआईजी दिग्विजय सुवेदीलाई नम्बर ७ वैद्यनाथ बाहिनी मुख्यालय, कैलालीमै पदस्थापन गरिएको छ । किरण बस्नेतलाई प्रधान कार्यालयस्थित महानिरीक्षकको कार्यालयबाट नम्बर ३ गढीमाई बाहिनी मुख्यालय, मकवानपुरमा पदस्थापन गरिएको छ ।

माधव प्रसाद पौडेललाई प्रधान कार्यालय भण्डार महाशाखाबाट नम्बर १ पशुपतिनाथ बाहिनी मुख्यालय, काठमाडौंमा पठाइएको छ भने प्रविण कँडेललाई कार्य विभागबाट नम्बर ४ मुक्तिनाथ बाहिनी मुख्यालय, कास्कीमा पदस्थापन गरिएको छ ।

राजेश उप्रेतीलाई कार्य विभागबाट एपीएफ कमाण्ड तथा स्टाफ कलेज, काठमाडौँमा पदस्थापन गरिएको छ । नेत्रबहादुर कार्कीलाई नम्बर १ पशुपतिनाथ बाहिनी मुख्यालयबाट सशस्त्र प्रहरी महानिरीक्षकको कार्यालयमा ल्याइएको छ भने राजेन्द्र खड्कालाई एपीएफ इन्टेलिजेन्स ब्युरोबाट मानवस्रोत विभागमा पदस्थापन गरिएको छ । सशस्त्र प्रहरी नियमावली, २०७२ को व्यवस्था अनुसार सरुवा तथा पदस्थापन गरिएको जनाइएको छ ।