काठमाडौं । एनआईसी एशिया बैंक लिमिटेडको वैशाख २० गते बसेको सञ्चालक समितिको बैठकले जेठ १८ गते सोमबार बोलाएको छ।

बैंकले यसअघि नै शेयरधनीलाई लाभांश वितरण नगर्ने निर्णय गरिसकेको छ। सभाले २ः१ को अनुपातमा हकप्रद शेयर निष्काशन गर्न र आवश्यकता अनुसार प्रबन्धपत्र र नियमावली संशोधन गर्न सञ्चालक समितिलाई अख्तियारी प्रदान गर्नेछ।

साथै अधिकृत पूँजी वृद्धि गरी १९ अर्ब ९२ करोडबाट २७ अर्ब ३८ करोड बनाउन, जारी पूँजी १९ अर्ब ९१ करोड ७५ लाख रुपैयाँबाट २७ अर्ब ३७ करोड ६३ लाख बनाउन र चुक्ता पूँजी १९ अर्ब ९१ करोड ७५ लाख रुपैयाँबाट २७ अर्ब ३७ करोड ६३ लाख बनाउन स्वीकृति दिने र केन्द्रीय कार्यालय कमलादीस्थित आफ्नै भवनमा कायम गर्ने प्रस्ताव पारित गर्नेछ।

यसका अतिरिक्त गत आर्थिक वर्षको वार्षिक प्रतिवेदन, लेखापरीक्षकको प्रतिवेदन, वासलात, नाफा नोक्सान हिसाब र नगद प्रवाह विवरण सहित सहायक कम्पनी एनआईसी एशिया लघुवित्त र एनआईसी एशिया क्यापिटलको वित्तीय विवरण सहितको एकीकृत वित्तीय विवरण पारित गर्नेछ।

त्यस्तै चालू आर्थिक वर्षका लागि लेखापरीक्षक नियुक्त गरी निजको पारिश्रमिक तोक्ने, सञ्चालक समितिको अध्यक्षमा अशोक कुमार अग्रवालको नियुक्ति अनुमोदन गर्ने, सर्वसाधारण शेयरधनी अनुपा प्रधान राजभण्डारीको नियुक्ति अनुमोदन गर्ने र संस्थापक शेयरधनीको तर्फबाट ३ जना र सर्वसाधारण शेयरधनीको तर्फबाट ३ जना सञ्चालकको निर्वाचन गरिनेछ।

साधारण सभा प्रयोजनार्थ बैंकले जेठ ६ गतेदेखि १८ गतेसम्म बूक क्लोज गर्ने निर्णय गरेको छ। बूक क्लोजको आधारमा नेपाल स्टक एक्सचेन्ज (नेप्से) मा जेठ ५ गतेसम्म कायम शेयरधनी मात्रै साधारण सभामा भाग लिन र मनदान गर्न योग्य हुनेछन्।

अठ्ठाईसौं वार्षिक साधारण सभा काठमाडौंको भद्रकालीस्थित आर्मी अफिसर्स क्लबमा बिहान ९ बजेबाट शुरु हुने छ।