काठमाडौं । आज र भोलि २ दिन भिटामिन ‘ए’ र जुकाको औषधि देशभरि रहेका पाँच वर्षसम्मका बालबालिकालाई खुवाइँदै छ । यसअघि  वैशाख ६ र ७ गतेका लागि दोस्रो चरणको यो कार्यक्रम तय गरेको थियो । तर लकडाउन र कोरोना भाइरसको त्रासका कारण रोकिएको थियो । सोही कार्यक्रम सरकारले यहीँ असार २२ र २३ गतेका लागि तय गरेको हो ।

स्वास्थ्य सेवा विभाग, पोषण शाखाका अनुसार आज र भोलि आफ्नो घर नजिकको खोप केन्द्रमा लगेर बालबालिकाहरुलाई भिटामिन ‘ए’ का साथै जुकाको औषधि र बालभिटा समेत निःशुल्क प्राप्त गर्न सकिनेछ ।

स्वास्थ्य सावधानी अपनाएर उक्त सेवा लिन शाखाले सबै अभिभावकहरुलाई अनुरोध गरेको छ ।

भिटामिन ए र बालभिटा पाँच वर्षसम्मका सबै बालबालिकालाइ दिए पनि जुकाको औषधि भने एक वर्षभन्दा माथिका बालबालिकालाई मात्र दिने गरिएको छ ।

बालबालिको स्वास्थ्य जटिलता तथा कुपोषणको जोखिम न्यूनीकरण गर्न र रोग प्रतिरोधी क्षमता विकास गर्न सरकारले विभिन्न खोप र भिटामिन कार्यक्रम चलाउँदै आएको छ ।