काठमाडौँ । चोभार सुख्खा बन्दरगाहबाट ४९ वटा सवारी साधन जाँचपास भएका छन् । बन्दरगाहमा असार १४ गतेदेखि जाँचपासका लागि नयाँ सवारी आउन सुरु भएको थियो ।

बन्दरगाहमा नयाँ सवारी जाँचपासका लागि आउने क्रम बढ्दै गएको बताइएको छ ।कार्यकारी निर्देशक आशिष् गजुरेलले हालसम्म सांग्रिला मोटर्सको पेट्रोलबाट चल्ने ४४ वटा सिट्रोन कारहरु र जीओ अटोमोवाइल्सको ५ वटा ‘डबल क्याब पिक–अप’ गाडी चोभार भन्सार कार्यालयबाट भन्सार जाँचपास गर्नेगरी आएको बताए । उक्त गाडीहरु वीरगञ्ज एकीकृत जाँच चौकीबाट चोभार सुक्खा बन्दरगाहमा ल्याएको हो ।

हाल सवारी साधन आउन सहजीकरण गरिएको र नाडा अटोमोबाइल्स एसोसिएसनसँगको छलफलपछि चोभारमा सवारी जाँचपासका लागि आउन थालेको गजुरेलको भनाई छ ।

चोभारमा भन्सार जाँचपासको लागि आउने मालवाहक सावरी साधन एवं नयाँ सवारी साधनहरुको लागि प्रवेश निःशुल्क छ । यस्तै पार्किङ र गोदान शुल्क समेत न्यून रहेको बताइएको छ ।

चोभार सञ्चालनमा आएदेखि हालसम्म १७६ वटा कन्टेनर र ४९ नयाँ गाडीहरु भन्सार जाँचपासको लागि एका छन् । यो आयोजना विश्व बैंकससँगको ऋण सहयोगमा डेढ अर्ब रुपैयाँको लागतमा बनेको हो ।