काठमाडौँ। दशैँ मनाउन गाउँघर गएका मानिसहरू बिदा सकिएसँगै राजधानी फर्किन थालेपछि काठमाडौँका सडक, सार्वजनिक यातायात र बसपार्कहरूमा यात्रुको चहलपहल र चाप बढेको छ।

रोजगारी, अध्ययन तथा व्यवसायका लागि काठमाडौँमा बसोबास गर्दै आएका नागरिकहरू दशैँको टीका, जमरा र पारिवारिक भेटघाट सकिएपछि आफ्नो नियमित कर्मथलोमा फर्किरहेका छन्।

काठमाडौँ उपत्यका ट्राफिक प्रहरी कार्यालयका प्रवक्ता एवं प्रहरी उपरीक्षक नरेशराज सुवेदीका अनुसार लामो बिदापछि सरकारी तथा गैरसरकारी कार्यालय, शैक्षिक संस्था र विभिन्न व्यवसाय पुनः सञ्चालनमा आउन थालेकाले राजधानी फर्किने यात्रुको सङ्ख्या दिनप्रतिदिन बढ्दै गएको छ।

यात्रुको आवागमन सहज र व्यवस्थित बनाउन ट्राफिक प्रहरीले प्रमुख नाकाहरूमा सवारी व्यवस्थापनमा सक्रियता बढाएको छ।

उपत्यका भित्रिने तथा बाहिरिने प्रमुख नाकाहरू नागढुङ्गा (थानकोट), साँगा (भक्तपुर), मुड्खु (बालाजु), फर्पिङ (बल्खु) र टोखा (छहरे) क्षेत्रमा सवारीसाधन र यात्रुको बाक्लो चाप देखिएको ट्राफिक प्रहरी कार्यालयले जनाएको छ।