काठमाडौं । चलचित्र मार्फत नेपालको पर्यटनमा सुधार गर्ने उद्धेश्यका साथ पर्यटन बोर्ड र चलचित्र विकास बोर्डबीच चार बुँदे समभदारी पत्रमा हस्ताक्षर भएको छ।

उक्त समझदारी बुधबार पर्यटन बोर्डमा भएको हो। चलचित्र विकास बोर्डका अध्यक्ष दिनेश डिसी र पयर्टनको बोर्डका अधिकृत दीपकराज जोशीले समझदारी पत्रमा हस्ताक्षर गरेका हुन्।

समझदारी अनुसार प्रत्येक वर्ष हुने प्रतिष्ठित कान्स फिल्म फेस्टिभलमा नेपालको आधिकारिक पभेलियन स्थापना गरी नेपाली चलचित्र तथा नेपालका पर्यटकीय गन्तव्यको अन्तर्राष्ट्रिय प्रचार–प्रसार गरिनेछ । त्यस्तै, पोखरालाई चलचित्र र पर्यटनको संगमस्थलका रूपमा विकास गर्न फिल्म फेस्टिभल आयोजना गरिने सहमति भएको छ।

चलचित्र विकास बोर्डका अध्यक्ष डिसीले यो सहकार्यलाई “लामो यात्राको सुरुवात” भएको बताएका छन् । पर्यटन बोर्डका अधिकृत जोशीले नेपाललाई “ल्याण्ड अफ मेमोरेबल स्टोरिज्” का रूपमा स्थापित गर्ने लक्ष्यसहित चलचित्र पर्यटनलाई प्राथमिकतामा राखिएको बताए ।

समझदारी पत्रमा अन्तर्राष्ट्रिय प्रदर्शनी तथा बजारमा संयुक्त प्रवर्द्धन गर्ने, नेपाललाई अडियो–भिजुअल उत्पादनका लागि आकर्षक गन्तव्यका रूपमा स्थापित गर्ने तथा पूर्वाधार विकास र प्रवर्द्धन अभियान सञ्चालन गर्ने विषय समेटिएका छन् ।