काठमाडौँ । त्रिभुवन अन्तर्राष्ट्रिय विमानस्थल कार्यालयका प्रमुख अध्यागमन अधिकृत तीर्थराज भट्टराईलाई अख्तियार दुरुपयोग अनुसन्धान आयोगले नियन्त्रणमा लिएको छ । बुधबार केहीबेरअघि अख्तियारले उनलाई टंगालस्थित कार्यालयमा लगेको हो ।

भट्टराईलाई मंगलबार बेलुका आकस्मिक रूपमा गृह मन्त्रालयमा सरुवा गरिएको थियो । गृह मन्त्रालयले उनको स्थानमा पाँचथरका प्रमुख जिल्ला अधिकारी विष्णुप्रसाद कोइरालालाई प्रमुख अध्यागमन अधिकृतको जिम्मेवारी दिने निर्णय गरेको थियो ।

भट्टराईमाथि भिजिट भिसामा दुबईलगायतका मुलुक जानेबाट रकम असुल्ने गरेको आरोपमा उजुरी परेको थियो । सोही उजुरीका आधारमा अख्तियारले उनलाई अनुसन्धानका लागि नियन्त्रणमा लिएको हो ।