काठमाडौँ। नेपाल लाइफ इन्स्योरेन्स कम्पनी लिमिटेडले हिमालयन रिइन्स्योरेन्स कम्पनीका आधारभूत सेयरधनी दिपक भट्टले आफ्नो सहायक कम्पनीबाट ३७ करोड रुपैयाँ दुरुपयोग गरेको भनी विभिन्न सञ्चारमाध्यममा प्रकाशित समाचारको खण्डन गरेको छ । कम्पनीले आज एक प्रेस विज्ञप्ति जारी गर्दै उक्त समाचारप्रति गम्भीर ध्यानाकर्षण भएको जनाएको हो ।

कम्पनीले जारी गरेको विज्ञप्ति अनुसार भट्टले नेपाल रिइन्स्योरेन्स कम्पनी लिमिटेड लगायतका सेयर दोस्रो बजारबाट खरिद गर्न आफ्नो सहायक कम्पनीबाट ३७ करोड रुपैयाँ दुरुपयोग गरेको भन्ने खबर निराधार छन् । नेपाल लाइफ इन्स्योरेन्सको यस विषयमा दिपक भट्ट वा धितोपत्र दलाल नं. ५५ भृकुटी स्टक ब्रोकर कम्पनी प्रालिसँग कुनै संलग्नता वा कारोबार नरहेको स्पष्ट पारेको छ ।

नेपाल लाइफ इन्स्योरेन्सले आफू सधैं प्रचलित कानुन, नियामक निकायका मापदण्ड तथा संस्थागत सुशासनका सिद्धान्तहरूको पूर्ण पालना गर्दै आफ्नो व्यवसाय सञ्चालन गर्दै आएको विज्ञप्तिमा उल्लेख छ । कम्पनीले बजारमा उत्पन्न भ्रम निराकरण गर्नका लागि यो स्पष्टीकरण जारी गरेको जनाएको छ ।