काठमाडौं । बाल गृहमा आश्रय लिई रहेका बालबालिकाको निःशुल्क स्वास्थ्य बीमाका लागि स्वास्थ्य बीमा बोर्डले विशेष व्यवस्था गर्ने भएको छ ।

कानूनको विवादमा परी सुधार गृहमा रहेका बालबालिकाको स्वास्थ्य उपचार सेवाका लागि बोर्डले परिवर्तित नाम सहितको बीमा कार्ड जारी गर्न लागेको हो ।

बोर्डका अनुसार सुधार गृहमा राखिएका कानूनको विवादमा परेका बालबालिकाको उपचार सेवाका लागि उनीहरूको परिवर्तित वा सांकेतिक नामका आधारमा बीमा कार्ड जारी गरिनेछ । यस्तो गर्दा बालबालिकाको गोपनीयताको हकको सुरक्षाको प्रत्याभूती दिलाउन सम्भव हुनेछ ।

बालबालिका सम्बन्धी ऐन २०७५ ले निश्चित उमेरसम्मका नाबालिगहरूलाई कसूरको अवस्थाका आधारमा वयस्क सरह जेल सजाय नगरी सुधार गृहमा राख्नुपर्ने व्यवस्था गरेको छ ।

कुनै अपराधमा संलग्न भएको अभियोगको पुष्टी पछि अदालतले सजाय तोकेको बालबालिकालाई कानूनको विवादमा परेका बालबालिकाका रूपमा परिभाषित गरिएको छ ।

बीमा बोर्डले डोटी, बाँके, रूपन्देही, पर्सा र मकवानपुरस्थित जिल्ला सम्पर्क शाखालाई बिहीबार निर्देशन जारी गर्दै बाल गृहले उपलब्ध गराएको सांकेतिक नामको आधारमा एकीकृत सूचना प्रणालीमा विवरण प्रविष्ट गरी बीमा कार्ड जारी गर्न भनेको छ ।