काठमाडौं । गुगलले जिमेल प्रयोगकर्ताका लागि इमोजी रियाक्सन फिचर सार्वजनिक गरेको छ । बुधवार एक ब्लग मार्फत कम्पनीले जिमेलमा आएको ईमेलमा तत्कालै इमोजी रियाक्सन पठाउन सकिने फिचर सार्वजनिक गरेको घोषणा गरेको हो ।

यो फिचर बुधवार घोषणा गरेसँगै गुगलले सुरुवाती चरणमा संसारभरका एन्ड्रोइड प्रयोगकर्तालाई उपलब्ध गराउन थालेको छ । त्यसपछिका केही महिनामा वेब तथा आईओएसमा उपलब्ध गराउने गुगलको भनाइ छ ।

तपाईंको जिमेलमा यो फिचर उपलब्ध भयो भने आएको ईमेलको तलपट्टि एउटा स्माईलीको इमोजी आइकन देखिनेछ ।  तपाईंले  सोही  इमोजीमा क्लिक गर्नुभयो भने अन्य इमोजी देखिनेछन् । त्यसमध्ये ईमेल अनुसार आफूलाई उपयुक्त लागेको इमोजी पठाउन सक्नुहुनेछ ।

अहिले जसरी फेसबुक, ह्वाट्सएप, टेलिग्राम, भाइबरमा आएका मेसेजलाई तत्कालै इमोजीमार्फत आफ्नो प्रतिक्रिया जनाउन पाइन्छ, त्यसरी नै जिमेलबाट पनि प्रतिक्रिया जनाउन सकिने बताइएको छ । त्यस्तै एक पटक ईमेलमा आफूले दिइसकेको रियाक्सन पुनः फिर्ता लिन पनि सकिन्छ ।

यदि तपाईं जिमेल बाहेक अन्य कुनै ईमेल सेवा प्रयोग गर्नुहुन्छ भने त्यहाँ पनि जिमेल प्रयोगकर्ताले पठाएको इमोजी रियाक्सन देखिनेछ । तर यसमा केही सीमितता छन् ।

विभिन्न स्कुल तथा कम्पनीको ईमेल अकाउन्टबाट रियाक्सन भने पठाउन सकिने छैन । त्यस्तै कुनै ईमेल २० ओटाभन्दा बढी प्रयोगकर्तालाई पठाइएको छ भने पनि रियाक्सन पठाउन सकिने छैन । त्यस्तै कुनै एउटा ईमेलबाट आएको मेसेजमा प्रयोगकर्ताले २० ओटाभन्दा बढी इमोजी पठाएको छ भने पनि उसले अन्य मेसेजमा रियाक्सन इमोजी पठाउन सक्ने छैन ।

१७ असोज २०८०, बुधवार १७:३८ बजे प्रकाशित