काठमाडौं । बैंक तथा वित्तीय संस्थाले संचालन गरेको वित्तीय साक्षरता सम्बन्धी अभियान प्रभावकारी नभएको गुनासो आएपछि नेपाल राष्ट्र बै‌ंकले मार्गदर्शन नै जारी गर्नुपरेको छ। केन्द्रीय बैंकले वित्तीय साक्षरता मार्गदर्शन २०७९ जारी गरेको हो ।

राष्ट्र बैंकले इजाजत प्राप्त संस्था (बैंक र फाइनान्स) ले वित्तीय साक्षरता सम्बन्धी अध्ययन सामग्री सम्प्रेषण गर्दा आफ्ना सेवाको विज्ञापन गर्ने, ब्राण्डिंग गर्ने, व्यापारीक अभियान स‌ञ्चालन गर्ने नभई मूलतः उपयोगी वित्तीय ज्ञान तथा सीप विकास गर्नेमा केन्द्रित हुन निर्देशन दिएको छ।

राष्ट्र बैंकले वित्तीय साक्षरता कार्यक्रम संचालन गर्दा लक्षित समूहको पहिचान गरेर समूहको साक्षरता र बौद्धिक स्तर अनुसारको कार्यक्रम निर्धारण गरेर साक्षरता अभियान संचालन गर्नका लागी मार्गदर्शन मार्फत् निर्देशन दिएको छ।

राष्ट्र बैंकले इजाजत प्राप्त वित्तीय स‌ंस्थाले वित्तीय साक्षरता इकाई मार्फत् अभियानको नियमित अनुगमन गरेर प्रभावकारीता सम्बन्धतमा प्रतिवेदन तयार पार्न र तोकिएको ढाँचामा राष्ट्र बैंक समक्ष पेश गर्नुपर्ने प्रावधान समेत लागू गरेको छ।

यसअघि वित्तीय साक्षरता ढाँचा २०७८ मार्फत् राष्ट्र बैंकले कार्यक्रमको ढाँचा तय गर्नका लागी बैंक तथा वित्तीय संस्थालाई सहजीकरण गरेकोमा अहिले निर्देशका नै जारी गरेको हो ।

मार्गदर्शनमा साक्षरता अभियान स‌ंचालनका लागी नियमित आम्दानी प्राप्त गर्ने (रोजगार,) निश्चित आम्दानी नभएका (कृषक, साना उद्यमी), विद्यार्थी (माध्यमिक र उच्च माध्यमिक तहका बिद्यार्थी), महिला, विप्रेषण प्रापक र यूवा समेत जम्मा ६ वर्गमा बै‌ंकका ग्राहकलाई वर्गिकरण गर्न निर्देशन दिइएको छ।