काठमाडौं । भर्खरै आइपीओ जारी गरे नेपाल इन्फ्रास्ट्रक्चर बैंकले चालु आर्थिक वर्षको दोस्रो त्रैमाससम्मको वित्तीय विवरण सार्वजनिक गरेको छ । सार्वजनिक वित्तीय विवरणअनुसार बैंकको खुद नाफा १२.५४% ले घटेर ३५ करोड २२ लाख ५५ हजार रुपैयाँमा सीमित भएको छ । अघिल्लो वर्ष बैंकले ४० करोड २७ लाख ८३ हजार रुपैयाँ नाफा कमाएको थियो ।

यसअवधिमा बैंकको खुद ब्याज आम्दानी र सञ्चालन नाफा दुवै घटेकाले नाफा प्रभावित भएको हो । खुद ब्याज आम्दानी ७।७२५ ले घटेर ५६ करोड ९४ लाख ८५ हजार रुपैयाँमा सीमित भएको छ । अघिल्लो वर्ष बैंकले ६१ करोड ७१ लाख ३३ हजार रुपैयाँ ब्याज आम्दानी गरेको थियो । सञ्चालन नाफा पनि १२.३१% ले घटेर ५० करोड ३५ लाख ७६ हजार रुपैयाँमा आएको छ । अघिल्लो वर्ष बैंकले ५७ करोड ४३ लाख २० हजार रुपैयाँ कमाएको थियो ।

पुस मसान्तसम्म आइपुग्दा बैंकको प्रतिसेयर आम्दानी पनि ८४ पैसाले घटेर ५ रुपैयाँ ८७ पैसा कायम भएको छ । अघिल्लो वर्ष प्रतिसेयर आम्दानी ६ रुपैयाँ ७१ पैसा थियो । पुस मसान्तसम्म १२ अर्ब रुपैयाँ चुक्ता पुँजी रहेको बैंकले भर्खरै आइपीओ जारी गरेको हो । आइपीओ जारी पछि पुँजी २० अर्ब रुपैयाँ पुगेको छ । जगेडा कोषमा १ अर्ब ९४ करोड २५ लाख ८१ हजार रुपैयाँ छ ।