काठमाडौं ।  माछापुच्छ्रे बैंकको २५ औं साधारण सभा आज असोज १८ गते बिहीबार बस्दैछ । साधारणसभा होटल पोखरा ग्राण्ड पार्दीमा बिहान ११ बजेदेखि सुरु हुनेछ ।

साधारण सभामा बैंकले सेयरधनीहरुलाई गत आर्थिक वर्षको नाफाबाट हाल कायम चुक्ता पुँजीको १३.३०% बोनस र कर प्रयोजनको लागि ०.७०% नगद लाभांश वितरण गर्ने प्रस्ताव पेश गर्नेछ ।

नेपाल राष्ट्र बैंकबाट स्वीकृत भइसकेको उक्त लाभांश अब बैंकको यस साधारण सभाले पारित गरेपछि सेयरधनीहरुलाई वितरण हुनेछ ।

साथै, अन्य उपयुक्त बैंक तथा वित्तीय संस्थाहरुसँग मर्जर अथवा एक्विजिशन सम्बन्धि कार्य गर्न तथा बैंकको प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने प्रस्ताव पनि छ ।

लेखापरीक्षक नियुक्त गर्ने लगायतका प्रस्तावहरु पनि साधारण सभाले पारित गर्नेछ । साधारण सभा प्रयोजनार्थ बैंकले असोज ८ गते एक दिनका लागि बुक क्लोज गरिसकेको छ ।
तसर्थ, असोज ७ गतेसम्म कायम रहेका सेयरधनीले प्रस्तावित लाभांश र साधारण सभामा भाग लिन पाउने छन् ।

१८ असोज २०८०, बिहीवार ०९:५३ बजे प्रकाशित