टाटा मोटर्सले सन् २०२६ को टिगोर फेसलिफ्टको नयाँ डिजाइन भारतमा पेटेन्ट दर्ता गराएको छ । पेटेन्ट तस्बिरअनुसार कम्पनी आफ्नो लोकप्रिय सब–४ मिटर सेडानलाई नयाँ स्वरूपमा बजारमा ल्याउने तयारीमा रहेको संकेत दिएको छ ।

रिपोर्ट अनुसार नयाँ टिगोरको फ्रन्टमा उल्लेखनीय परिवर्तन गरिएको छ । यसमा नयाँ बम्पर, ठुलो लोअर एयर इनटेक र होरिजन्टल स्ल्याट समावेश गरिएको छ । साथै हेडलाइटको डिजाइन पनि परिमार्जन गरिएको छ, जसले कारलाई पहिलेभन्दा अझ आकर्षक र आधुनिक स्वरूप दिएको छ । बोनटको डिजाइन भने अघिल्लो मोडलसँग मिल्दोजुल्दो रहेको छ । यसमा नयाँ डिजाइनको अलोय ह्विल समावेश गरिएको छ । पछाडिको भागमा नयाँ डिजाइनका टेललाइट र फ्ल्याट लुक दिइएको छ ।

हालै लन्च गरिएको नयाँ टियागोमा उपलब्ध धेरै फिचर नयाँ टिगोरमा पनि समावेश हुने अपेक्षा गरिएको छ । यसमा एलईडी हेडलाइट, एलईडी टेललाइट, १५ इन्चका ड्युअल टोन अलोय ह्विल, १०.२५ इन्चको टचस्क्रीन इन्फोटेनमेन्ट सिस्टम, वायरलेस एप्पल कारप्ले र एन्ड्रोइड अटो, डिजिटल इन्स्ट्रयुमेन्ट क्लस्टर, वायरलेस चार्जर, अटोमेटिक क्लाइमेट कन्ट्रोल, क्रुज कन्ट्रोल र एएमटी भेरिएन्टमा प्याडल सिफ्टरजस्ता फिचर उपलब्ध हुने अनुमान गरिएको छ ।

यसको क्याबिनमा पनि नयाँ टियागोबाट प्रेरित ड्यासबोर्ड डिजाइन, ठुलो टचस्क्रिन, नयाँ सेन्टर कन्सोल, डिजिटल डिस्प्ले र इन्टिरियर ट्रिम्स प्रयोग गरिने अपेक्षा गरिएको छ, जसले कारलाई थप प्रिमियम अनुभूति दिनेछ ।

यसमा हालकै १.२ लिटर क्षमताको तीन सिलिन्डर पेट्रोल इन्जिनलाई निरन्तरता दिइने अनुमान गरिएको छ, जसले ८६ हर्सपावर र ११३ एनएमको टर्क उत्पादन गर्छ । सिएनजी भर्सनमा सोही इन्जिनले ७३ हर्सपावर र ९५ एनएमको टर्क प्रदान गर्छ ।

यद्यपि टाटा मोटर्सले हालसम्म नयाँ टिगोर फेसलिफ्टको आधिकारिक लन्च मिति घोषणा गरेको छैन । तर पेटेन्ट डिजाइन सार्वजनिक भइसकेकाले सो मोडल निकट भविष्यमै भारतीय बजारमा प्रवेश गर्ने सम्भावना रहेको छ ।