मारुती सुजुकीले आफ्नो इतिहासमा पहिलो पटक एक क्यालेन्डर वर्षमा २० लाख गाडी उत्पादनको माइलस्टोन हासिल गरेको छ । यस्तो उपलब्धी भारतमा अन्य कुनै कार निर्माताले हासिल गर्न सकेको छैन ।

यो माइलस्टोनमा पुग्ने सुजुकी मोटर कर्पोरेशनको विश्वव्यापी अटोमोबाइल उत्पादन सुविधाहरूमध्ये मारुती सुजुकी पहिलो समेत हो ।

कम्पनीका अनुसार मानेसरमा उत्पादन लाइनमा रोल अफ गर्ने २० लाखौं गाडी अर्टिगा थियो । उत्पादन भएका २० लाख गाडीमध्ये ६० प्रतिशत हरियाणा र ४० प्रतिशत गुजरातमा उत्पादन भएका थिए ।

बलेनो, फ्रन्क्स, एर्टिगा, वागनआर र ब्रेजा जस्ता मोडलहरू सन् २०२४ मा उत्पादित उत्कृष्ट ५ सवारी साधनमा परेका थिए ।

हाल, मारुती सुजुकीको भारतमा तीनवटा उत्पादन इकाइहरू छन् । जसको संयुक्त वार्षिक उत्पादन क्षमता २३ लाख ५० हजार युनिट छ । कार निर्माताले यसलाई ४० लाख युनिटसम्म विस्तार गर्ने योजना बनाएको छ ।

बढ्दो मागलाई पूरा गर्न मारुतीले खरखोडामा नयाँ सुविधा निर्माण समेत गरिरहेको छ । उक्त प्लान्ट २०२५ मा सञ्चालनमा आउने जनाइएको छ ।

पूर्ण रूपमा सञ्चालनमा आएपछि यो प्लान्टले वार्षिक १० लाख युनिट कार उत्पादन गर्नेछ । साथै, कम्पनीले १० लाख युनिट क्षमताको अर्को प्लान्ट समेत निर्माण गर्ने योजना बनाएको छ ।