काठमाडौं ।अहिले २० देशमा नेपाली राजदुत पद खाली छ । राजदूत बन्नका लागि नेता,बुद्धिजीवीदेखि मेनपावर व्यवसायी समेत दौडधुपमा लागेका छन । पैसा भएर पनि इज्जत कमाउन नपाएका वा नसकेकाहरु अहिले राजदूत बनेर प्रतिष्ठा कमाउने ध्याउन्नमा छन् ।

कतिपय भने पैसाको आडमा पद नै खरिद गरेर थप आम्दानीको स्रोत बनाउन चाहिरहेका छन् । कांग्रेसका केही नेताहरू राजदुत बनाउने ठेक्का गर्दै बार्गेनिङमा रहेको समेत चर्चा छ।

त्यसमा पनि नेपालबाट राजदूत भएर जाने व्यक्तिले नेपालको इज्जत राख्नेभन्दा धेरै बेइज्जत गर्ने गरेको घटनाहरु थुप्रै छन् । मानव तस्करीको आरोपदेखि घर खरिदमा अनियमितता गर्नेसम्मको हर्कत विगतमा सार्वजनिक भएका छन ।

खाडी देशमा राजदूत भएर जानेहरुले नेपाली कामदारको मृत्यु हुँदा त्यसबापत प्राप्त सहयोग रकममा पनि भ्रष्टाचार गर्ने राजदूत भेटिएका थिए ।

राजदूत भएरै डलर कमाई हुने देखेर हुनसक्छ, अहिले नेपालस्थित कतारी राजदूतको सल्लाहकारको भूमिका रहेका व्यक्ति पनि कतारको राजदूत हुने दौडमा लागेका छन । कतार कामदार पठाउने म्यानपावर कम्पनीहरु पनि ती व्यक्तिलाई राजदूत बनाउने प्रयासमा छन् ।

म्यानपावर कम्पनी कतारको राजदूतका सल्लाहकारलाई कतारको राजदूत बनाएर पठाउन सकिए थप आम्दानी जुटाउन सकिने बताउन थालेका छन् । कांग्रेसनिकट म्यानपावर व्यवसायीहरु पैसाको थैलो बोकेर प्रधानमन्त्री शेर बहादुर देउवा र परराष्ट्र मन्त्री डा। नारायण खडका निवास धाउन थालेका छन् ।

लुम्बिनी प्रदेशमा घर भएका ती सल्लाहकार लामो समयदेखि कतार राजदूतको सल्लाहकारको भूमिकामा थिए । पिएचडीसमेत गरिसकेका ती सल्लाहकार पनि राजदूतका लागि जति पनि पैसा खर्च गर्न मनसायमा छन ।

त्यसैले, म्यानपावर कम्पनीका सञ्चालकहरु पनि उनलाई कतारको राजदूत बनाएर पठाउन सकिए कतार प्रहरीका लागि माग भएर आउने कामदारहरुको स्रोत आफूहरुले पाउने स्वार्थमा लालायित भएका छन् ।

कतारकै राजदूतका बन्ने प्रयासमा पूर्वराजदूत रमेश कोइराला पनि लागेका छन् । उनी पहिला श्रम तथा रोजगार मन्त्रालयमा मन्त्री टेकबहादुर गुरुङको सल्लाहकार थिए ।

त्यही बेला उनी कतारको राजदूत भएर गएका थिए । अघिल्लो सरकारका प्रधानमन्त्री केपी शर्मा ओलीले उनलाई फिर्ता बोलाएपछि नेपाल आएका कोइराला अहिले ओली सरकारबाट अपमान भयो गठबन्धन सरकारबाट न्याय र सम्मान पाउनुपर्छ भन्दै राजदूतको दौडमा लागेका छन् ।