काठमाडौं । यस पटकको दशैंमा नयाँ नोट चाहिएमा आफ्नो खाता रहेको बैंकबाट साट्न पाइने छ । कोरोना भाइरस प्रकोपलाई मध्यनजर गर्दै यस्तो व्यवस्था गर्न लागिएको राष्ट्र बैंकका प्रवक्ता गुणाकर भट्टले बताए ।

प्रवक्ता भट्टका अनुसार नयाँ नोट केन्द्रीय बैंकले बैंक तथा वित्तीय संस्थालाई उपलब्ध गराउनेछ । आफ्नो खाता रहेको बैंक तथा वित्तीय संस्थामार्फत सर्वसाधारणले लिन सक्ने उनले बताए ।

‘यस पटक हामी लाइन लगाएर नयाँ नोट बाँढ्ने पक्षमा छैनौं । नयाँ नोट चाहिए हामी बैंक तथा वित्तिय संस्थालाई उपलब्ध गराउँछौ । उनीहरुमार्फत सर्वसाधारणले लिन सक्छन् ।’

यसअघिका दशैंमा केन्द्रीय बैंकले निश्चित शाखाहरु तोकेर नयाँ नोट वितरण गर्दै आएको थियो । फलस्वरुपः नयाँ नोट लिन उक्त शाखाहरुमा सर्वसाधारणको भीड लाग्ने गरेको थियो ।

कोरोना माहामारीका कारण लाइन लगाउन सम्भव नभएपछि केन्द्रीय बैंकले आफ्नो खाता रहेको बैंकको शाखाबाट नै सर्वसाधारणलाई नयाँ नोट उपलब्ध गराउन लागेको हो ।

पहिले दशैंमा मात्र नयाँ नोट साटिने व्यवस्था भए पनि पछिल्लो समय नयाँ नोट सटहीलाई राष्ट्र बैंकले समावेशी बनाइसकेको छ । गाईजात्रा, गौरा पर्व, तीज, उभौली, नयाँ वर्ष, छठ, जितिया पर्व, माघीजस्ता चार्डमा पनि नयाँ नोट सटहीको सुविधा दिदैं आएको छ ।