काठमाडौँ ।प्रसिद्ध बेलायती मोटरसाइकल निर्माता कम्पनी ट्रायम्फले आज आयोजना हुने एक विशेष कार्यक्रममार्फत चार वटा नयाँ मोटरसाइकल सार्वजनिक गर्ने तयारी गरेको छ ।

कम्पनीद्वारा जारी टिजरअनुसार नयाँ आउन लागेका मोडलहरूमा बहुप्रतिक्षित क्लासिक–स्टाइलको बोनभिल ४०० मुख्य आकर्षणका रूपमा रहने अनुमान गरिएको छ ।

अक्टोबर ६ को मध्यान्ह (नेपाली समयअनुसार अपराह्न ४ः४५ बजे) हुने यस विश्वव्यापी घोषणामा बोनभिल ४०० का साथै एउटा नयाँ नेकेड स्पोट्र्स र दुई वटा एड्भेन्चर मोडलहरू पनि समावेश हुनेछन् । सार्वजनिक हुने अन्य तीन मोडलहरूमा स्ट्रिट ट्रिपल र टाइगर सिरिजका नयाँ भेरियन्टहरू हुन सक्ने आँकलन गरिएको छ

सार्वजनिक भएको टिजर र पहिले देखिएका स्पाइ शटहरूका अनुसार बोनभिल ४०० मा परम्परागत क्लासिक बडी डिजाइन दिइएको छ । यसमा आकर्षक फ्युल ट्यांक, गोलो हेडलाइट र ऐना, समतल बेन्च सिट, पछाडि क्रोम ग्याब रेल र पिसूटर–स्टाइलको एक्जस्ट पाइप समावेश छ ।

स्पोक ह्विल, टेलिस्कोपिक फ्रन्ट फोर्क र ट्विन रियर शक एब्जोर्बरले यसलाई ट्राइम्फको स्पीड ४०० भन्दा फरक र परम्परागत लुक प्रदान गरेको छ ।

भारतीय बजार तथा यस आसपासका क्षेत्रका लागि प्रतिस्पर्धी मूल्य कायम गर्न कम्पनीले ३४९ सीसी वा ३९८ सीसी क्षमताको सिंगल–सिलिन्डर इन्जिन प्रयोग गर्न सक्ने जनाइएको छ । बजाज अटोको सहयोगमा उत्पादन गरिने यो मोडलले रोयल इन्फिल्ड क्लासिक ३५० र होन्डा सिबी३५० सँग प्रत्यक्ष प्रतिस्पर्धा गर्ने अपेक्षा गरिएको छ ।