काठमाडौं–भारतीय कार बजारमा टाटा मोटर्सले ऐतिहासिक सफलता हात पारेको छ । अगस्ट २०२६ को बिक्री तथ्यांकका आधारमा टाटाको लोकप्रिय कम्प्याक्ट एसयूभी पन्च मारुती सुजुकीका चर्चित मोडललाई पछि पार्दै सर्वाधिक बिक्री हुने गाडी बन्न सफल भएको छ ।

गत अगस्ट महिनामा टाटा पन्चले कुल २१ हजार ३२० युनिट बिक्री दर्ता गर्दै पहिलो स्थान हासिल गरेको हो । अघिल्लो वर्षको सोही अवधिमा १० हजार ७०४ युनिट बिक्री भएकोमा यस वर्ष यसको बिक्री झन्डै दोब्बर अर्थात् ९९ प्रतिशतले बढेको छ ।

शीर्ष १० भित्र मारुती सुजुकीका वेगनर (२०,१८० युनिट), स्विफ्ट (१९,८३२ युनिट) र फ्रंक्स (१८,७३० युनिट) लगायत ६ वटा मोडलहरू परे पनि टाटा पन्चले ती सबैलाई उछिन्दै बजारमा शीर्ष स्थान कब्जा गरेको हो । साथै, टाटाको अर्को मोडल नेक्सन पनि १८ हजार ४३१ युनिट बिक्रीसहित छैटौँ स्थानमा परेको छ ।

टाटा पन्च शीर्ष स्थानमा पुग्नुका पछाडि यसको आकर्षक एसयूभी डिजाइन, अग्लो सिटिङ पोसिजन र उत्कृष्ट सेफ्टी रेटिङ मुख्य कारण मानिएका छन् । कम बजेटमा सुरक्षित र भरपर्दो पारिवारिक गाडी खोज्ने ग्राहकका लागि यो पहिलो रोजाइ बनेको छ ।

यसका साथै पेट्रोल, सीएनजी र इलेक्ट्रिक गरी तीनवटै भेरियन्टमा उपलब्ध हुनुले पनि यसको बिक्री बढाउन ठूलो भूमिका खेलेको छ ।