काठमाडौँ । किशोर थापाले त्रिभुवन विश्वविद्यालय सेवा आयोगको अध्यक्षका रूपमा पद तथा गोपनीयताको शपथ लिएका छन्।

बिहीबार(आज) शिक्षा तथा खेलकुद मन्त्रालयमा आयोजित कार्यक्रममा विश्वविद्यालयका सहकुलपतिसमेत रहेका शिक्षामन्त्री सस्मित पोखरेलसमक्ष थापाले शपथ लिएका हुन्।

यसअघि प्रधानमन्त्री तथा त्रिभुवन विश्वविद्यालयका कुलपति बालेन शाहले बुधबार नेपाल सरकारका पूर्वसचिव तथा वरिष्ठ सहरी योजनाविद् थापालाई त्रिवि सेवा आयोगको अध्यक्षमा नियुक्त गरेका थिए।

त्यसै अवसरमा सेवा आयोगकी नवनियुक्त सदस्य प्रा. डा. रेजिना मास्केलाई अध्यक्ष थापाले पद तथा गोपनीयताको शपथ गराएका छन्। शपथ कार्यक्रममा शिक्षामन्त्री पोखरेलको पनि उपस्थिति रहेको थियो।

शपथपछि संक्षिप्त प्रतिक्रिया दिँदै अध्यक्ष थापाले त्रिवि सेवा आयोगको जिम्मेवारी निर्भीकता, निष्पक्षता र इमानदारीका साथ निर्वाह गर्ने प्रतिबद्धता व्यक्त गरेका छन्। उनले विश्वविद्यालयमा कार्यरत प्राध्यापक तथा कर्मचारीको वृत्ति विकास, पेसागत दक्षता अभिवृद्धि तथा विश्वविद्यालयको संस्थागत सुधारलाई प्राथमिकतामा राखेर काम गर्ने बताएका छन्।